Hdyž wuhotuja lětsa wot 3. do 8. nowembra w Choćebuzu hižo 25. mjezynarodny festiwal wuchodoeuropskeho filma, je to zdobom jubilej. Móžemy zhladować na stawizny tohole wuznamneho kulturneho zarjadowanja w Choćebuzu a cyłej Braniborskej. Hladamy-li na tematiku, na profil – předstajeja dźě tam najnowše produkcije z wuchodoeuropskich krajow, z Balkana a Baltikuma a wo nich –, da je Choćebuske zarjadowanje filmow jedyn z najwažnišich a najwobšěrnišich Europy. Po Berlinali je Choćebuski festiwal mjeztym tež druhi najwuznamniši cyłeje Němskeje – tak widźa to znajmjeńša eksperća a filmowcy sami.