Namrěwstwo Jana Arnošta Smolerja je Zwjazkej serbskich spěwarskich towarstwow (ZSST) jara wažne. Myslu předewšěm na Smolerjowej zběrce „Pěsnički hornich a delnich Łužiskich Serbow“, w kotrymajž je wjac hač 500 ludowych spěwow – wjace hač 300 hornjoserbskich a něhdźe 200 delnjoserbskich – zezběrał a tak přichodnym generacijam zachował. Jeju praktiski wužitk pak je w našim zwjazku skerje snadny, wšako wobstejimy we wjetšinje z chórow a spěwnych skupin, kotrež wjacehłósnje spěwaja, tak zo móže jenož jenička naša čłonska spěwna skupina tele zawostajenstwo woprawdźe a zwjetša tež w originalu wužiwać.
Młodźency a mužojo wokoło dr. Fabiana Kaulfürsta pěstuja jako Přezpólni staru tradiciju pólneho spěwanja. Za to móža jednohłósne wot Jana Arnošta Smolerja zezběrane pěsnje wužiwać. K tomu podawaja w swojich programach stajnje zajimawostki wokoło wubranych spěwow. Takle Přezpólni, kotřiž wšak wobsteja mjeztym dźesać lět, starodawne pěsnje publikumej znowa spřistupnjeja. Tak na swoje wašnje skutkowanje Smolerja zdobom dale wjedu a serbske ludowe pěsnje do ludu noša.
