Čłowjestwo dyrbi so dźensa před čłowjestwom wuchować

Pola mnje doma na dwaj a poł metra dołhej polcy z knihami, z kotrymiž su naše dźěći wotrostli, steji 24. wudaće „Christy“. Po informaciji nakładnistwa Neues Leben je „Christa“ z dwěmaj milionomaj eksamplarow do ludu šła ... Njejapcy, kaž by lětacemu ptakej z njewidźomnej sekeru šiju přerubnył, padny z politiskej změnu předań tež Brězanowych knihow, tež „Christy“, do bjezdna. A njeběch to jenož ja, kiž je so prašał, kak budźe na tutu změnu Jurij Brězan reagować. Znaju wuznamnych Drježdźanskich kolegow, spisowaćelow dźěćaceje literatury, kotřiž prajachu: „Schluss, das war’s!“

Hinak pola Jurja Brězana. W běhu 90tych lět je telko nowych knihow napisał a we wšelakich nakładnistwach wudawał kaž w žanym lětdźesatku swojeho žiwjenja do toho. Dźesać lět, dźesać knihow – za wulku skalu čitarstwa, za najmjeńšich, hač do wyšich šulskich lětnikow, hač do kriminalki wo wuju z Ameriki, humornje wo Salowčanach a po normaliće noweho časa wabjo z jungfernu, kotraž nochcyše do łoža.