W Sernjanach, Sulšecach, Koćinje, Smječkecach a druhdźe hołk a tołk knježiłoj – wšudźe z wopytom spokojom
Kóžde lěto znowa maja Sulšečanske žony dobre ideje za swój program. Tónraz bě jedna w serbskej drasće samo ze starym mopedom přijěła.Sezona lětušich wjesnych swjedźenjow so pomału nachila. Na někotrych wsach pak maja wobydlerjo swój swjatk hišće před sobu – kaž tónle kónc tydźenja w Serbskich Pazlicach, tydźenjej pozdźišo w Brětni/Michałkach a w septembru w Debricach (Döbra) a Ralbicach.
Tež lětsa běchu přewažnje wjesne kluby hromadźe z druhimi towarstwami kaž wohnjowej woboru, młodźinu a dalšimi cyłkami z wulkej prócu a lubosću swjedźenje přihotowali. Wšudźe su z wopytom spokojom, byrnjež wjedro tu a tam najrjeńše njebyło.
