Schrift vergrößern
Klěšnik (Wolkenberg) je jónkrótna, we wobłuku rekultiwowanja brunicoweje jamy Wjelcej-juh wot Vattenfalla wutworjena winica něšto južnje městnosće wotbagrowaneje wsy Klěšnik. W pozadku je aktiwna jama hišće widźeć. Axel Arlt (3)
Jasne kontury ma z płotom škitany areal. Šěsć hektarow wulka rekultiwowana płonina na skłoninje južnje zrosćeneju wsow Paprotneje (Papproth) a Šćeńca (Steinitz), wjesneju dźělow města Drjowka, je winica z mjenom Klěšnik (Wolkenberg). Na třoch terasach je 26 000 winowych pjenkow (winowcow) nasadźenych.
Bettina Muthmann ma winicu „za smjerć napjatu naležnosć“. Jako jednaćelka towaršnosće Wolkenberg zwr zamołwja wona marketing a stara so wo wšědne dźěło na arealu. Wukubłana wučerka přińdźe 1995 z poruhrskeho Mühlheima do Choćebuza, hdźež ma mandźelski Martin hospodarsku kencliju.
Wěda z Kassela pochadźaceho winicarja Martina Schwarza přisporja kwalitu wina marki Wolkenberg, kotrež zrawi w jeho winowej manufakturje w Mišnje. Wot lěta 1996 do 2013 dźěłaše wón na winowym kuble Hród Proschwitz. Na to je so zesamostatnił. Dźěło na winicy a we winowej pincy je jemu jenak wažne.
