Choćebuz (SN/bn). Pod hesłom „Reja do raja“ su wčera w klubowni Choćebuskeho Serbskeho domu wustajeńcu mólbow a grafikow Marion Kwicojc wotewrěli. Titlej přehladki wotpowědnje steja hudźba, reje a drasta w srjedźišću. Sylne, swěćace so barby tworja razne kontrasty w mólbach; grafiki su z pjerom a tušu zwoprawdźene čornoběłe rumy.
Twórby „steja sej w samostatnej wobrazowej rěči napřećo“ a „wudospołnjeja so w mjezsobnej bjezwuwzaćnosći“, kaž Marion Kwicojc koncepciju ekspozicije sama wopisuje. Inspiraciju namaka wona w swojej wosobinskej serbskej wokolinje, na swjedźenjach, wšudźe tam, „hdźež ludźo wšědnemu dnjej wućeknu a hdźež knježi zynk, kotryž złožuje so na rytmus wutroby a kotremuž so rejwarjo podrjaduja“. W Lipsku bydlaca, z delnjołužiskich Bórkowow pochadźaca tworjaca wuměłča a spěwarka – mjez druhim wustupuje wona ze skupinomaj „Serbska reja“ a „Kupazukow /Isle of Sounds“ kaž tež jako solistka – je wernisažu zhromadnje z hóstnej instrumentalnej skupinu hudźbnje wobrubiła. Lawdator bě dr. Hartmut Leipner.