Pomału so lětuše wjesne swjedźenje nachileja, po tym zo běchu so wone na někotrych blakach z mejemjetanjom po starodawnym wašnju zahajili. Přihot a přewjedźenje tajkeho tři dny trajaceho podawka wšak maja Ralbičenjo hišće před sobu. Woni hotuja so tuchwilu mjenujcy na swoje „babylěćo“ wot 7. do 9. septembra. Na wjedro wšak lětsa nichtó swarjeć njetrjeba, mějachmy a mamy dźě přeco hišće „kejžorske lěćo“. Tak běchu stany na wjesnych swjedźenjach, wosebje njedźelu popołdnju na zabawnym programje wjesnjanow, wšudźe kopate połne a wšitcy pěstowachu we wjesnej zhromadnosći lochku a lóštnu zabawu.