Nimale 500 ludźi bě minjenu njedźelu w Zdźěri, hdźež swjećeše starobiskop Joachim Reinelt zhromadnje z Radworskim wosadnym fararjom Benom Jakubašom Božu mšu składnostnje 50. róčnicy poswjećenja tamnišeje cyrkwje.
Nimo wot chóra Meja a Wulkodubrawskich muzikantow dostojnje wobrubjenych kemšow, jadriweho prědowanja biskopa z přeswědčiwej wotmołwu na prašenje „Što je zmysł Božeho domu?“ su předewšěm stawiznisce zajimowani tójšto zhonili. Woni mějachu tež hišće dalšej składnosći, wobhonić so wo stawiznach Zdźěrje a wo nabožnym žiwjenju we wsy. Domizniske towarstwo je we wosadnicy bywšeho hrodu za to z mnohimi fotami a dalšimi časowymi dokumentami wobhladanjahódnu wustajeńcu přihotowało.
