SLA po wuspěšnym zazběhu w Delnjej Łužicy z wječornym ptačokwasnym programom wotnětka „hornjoserbsce po puću“

Časowa jězba, zwonkazemscy zajimcy, kopica serbskich kaž tež mjezynarodnych hitow rozdźělnych dobow, widejowe sekwency, přepušćata tak mjenowana štwórta sćěna, tójšto sebjereferency a nic naposledk potencial swójbneje šmjatańcy po wašnju klasiskeje grjekskeje tragedije – lětuši wječorny ptačokwasny program Serbskeho ludoweho ansambla „To tla wěrno njej’!“ narěznje retomas temow a je předewšěm: pisany.