Sernjany swjeća lětsa prěnje pisomne naspomnjenje wsy před 600 lětami. Rodźeny Sernjančan a dobry znajer stawiznow delanskich wsow Pawoł Rota je někotre stawizniske zajimawoski wo wsy zestajał, kotrež čitarjam Serbskich Nowin we wjacorych dźělach spřistupnjamy:

Najstarše statokowe powěsće

Znate stawizniske powěsće ze Sernjan započinaja so 1419 z prěnim pisomnym naspomnjenjom wsy. Wěsće je wjes starša a z njej knježi dwór. Tola staršich powěsćow drje so ani nadźeć njetrjebamy. Jenož tajke z pozdźišich časow so namakaja, byrnjež najprjedy tež spore byłe. Někotre najstarše powěsće wo Sernjanskich statokach sym zwuběrał.

Slědźer w cyrkwinskich knihach ewangelskeje wosady w njedalokim Wóslinku je mi přećelnje podał tole:

15.05.1685 wěrowanaj Jan Weclich, młynski w Sernjanach, syn młynka Handrija Weclicha w Porchowje, a Marja Matješkec, dźowka njeboheho Maćija Matješki, młynka w Reichenau.