We łužiskej jězorinje je cyle moderna regatowa čara nastała.
Na Třižonjanskim jězoru njedaloko zapadneho brjoha su ju natwarili. Na cyłkownje 750 metrach wupřestrěwa so nowa moderna regatowa připrawa wodosportoweho towarstwa Při módrym dźiwje Drježdźany z.t. Wona wobsteji z dźesać jednotliwych čarow, moderneje časměrjenskeje připrawy a z tak mjenowaneho „startoweho črija“. Tón ma wubědźowacym fairne a předewšěm jenake wuměnjenja skićić. Čaru móža předewšěm za wubědźowanja na 200 a 500 metrow wužiwać. „Připrawa ma wysoki mjezynarodny standard a je po wšej Sakskej jónkrótna“, wjeseli so nawoda wotrjada Drježdźanskeho sportoweho towarstwa Kanu-Kids Łaz Marcel Fechner. W nadawku towarstwa su připrawu sobudźěłaćerjo Berlinskeho předewzaća Otto Mette Wasserbau GmbH natwarili. Za to dyrbjachu hač do 40 metrow dołhe woclane roły do zemje jězora zapušćeć. Připrawa na Třižonjanskim jězoru bywšu regatowu čaru na Hórnikečanskim jězorje naruna. Swój cil, ju hač do kónca julija dotwarić, su rjemjeslnicy docpěli. Tak smědźa ju wotnětka sportowcy wužiwać.