Po tym zo běch tu w młodźinskim wudaću SN wo swojej kolesowanskej turje po Krabatowym puću rozprawjał, předewzach sej znowa wulět z kołom. Tónraz ćehnješe mje spočatk julija do stolicy Sakskeje.
Z ćahom podach so rano zahe z Kamjenca do Drježdźan, hdźež započach hnydom do pedalow teptać. Hižo njedaloko dwórnišća zapołožich prěnju małku přestawku. Wobhladach sej starodawny Heinza Steyerowy stadion, arenu Drježdźanskich lodowych lawow kaž tež Waltera Fritzschowu akademiju, nowy treningowy centrum Dynama Drježdźany. Dale wjedźeše mje tura nimo Semperoweje opery, Zwingera, Dwórskeje cyrkwje a cyrkwje Našeje knjenje k přewozej Johannstadt.
