Po Chorwatskej

dale do Montenegra

Zadar, Split a Makarska –

to běchu prěnje stacije naju lěćneho

dowola. Dožiwjenja w tutych krasnych městach

Chorwatskeje je přećelka Melanie Wowčerjec,

kotruž hižo wot časa pěskoweho kašćika znaju,

w zašłym młodźinskim wudaću wopisała. To pak ­dawno njeje wšo! Hakle nětko so porjadny drama započa – a tak je sej naju jězba mjeno

„roadtrip“ tež woprawdźe

zasłužiła.

Přebytk w Makarskej njebě předołhi. Po třoch dnjach nastajichmoj so z bu­som přez Bosnisku-Hercegowinu hač do Dubrovnika. Po puću do hostela srjedź města njemóžachmoj dočakać, to wšo tež wodnjo widźeć. Nazajtra wob­hla­dachmoj sej najprjedy krasne stare město z typiskej měšćanskej mu­rju a twjerdźiznu Lovrijenac. Do toho smój direktnje před njej na přibrjohu snědałoj – lěpši start do dnja njedawa! Dale dźěše na horu Srd. Kaž hižo tójšto razow do toho bě tež tam njewšědny wuhlad. Wječor podachmoj so z přećelemi, kotrychž běchmoj wodnjo zeznałoj, do někotrych barow w starym měsće. Dokelž bě tón dźeń chětro napinacy, wostachmoj slědowacy jenož na přibrjohu.