Foće: SN/
Hanka Šěnec
Syman Hejduška a Jan Brězan (Trio a kumple), režiser István Kobjela a libretist Měrćin Wjenk (wotlěwa)
Přećiwki so přićahuja, kaž znate přisłowo zwěsća. Na tamnym boku wšak tež rěka, zo so přećiwki rady mjez sobu wotstorkuja. Zajimawa to zakładna konstelacija, tworjaca wuchadźišćo libreta Měrćina Wjenka za pop-operu „Carpe noctem – Njeskónčna nóc“. Wjele wjace nochcyše awtor wo wobsahu přeradźić.
Zhromadnje z wuměłskim nawodu projekta serbskeho hudźbneho kolektiwa Trio a kumple a towarstwa Pawk Janom Brězanom, cyłkownu koordinaciju zamołwjacym Symanom Hejdušku a Istvánom Kobjelu, kiž ma jako režiser nadawk, jednotliwe sceny nazwučować a do cyłka zwjesć, předstaji wón we wobłuku nowinarskeje konferency w Budyskej Röhrscheidtowej bašće event, kotryž změje 10. septembra w Chróšćanskej wjacezaměrowej hali „Jednota“ premjeru.