Wojerowski wyši měšćanosta Torsten Ruban-Zeh (SPD) w dohodownej rozmołwje ze Serbskimi Nowinami
Knježe Rubano-Zeho, loni w času korony krótko do adwentna sće swoje zastojnstwo nastupił. Loni žane hodowne wiki, lětsa znowa nic. Kak zhladujeće lěto pozdźišo na swoje město a na połoženje?
Wobstejnosće korony dla mějach lěto 2020 za sebje za jara pozitiwne. Mějach wjace chwile a móžach so chětřišo do nowych nadawkow zadźěłać. Adwentne wiki njejsym parował.
Za ludźi bě to wězo hinak. Tohodla móžachmy tež poměrnje spěšnje zwoprawdźić, zo njebu wulka jědla z hodownym wobswětlenjom spočatk januara hnydom zaso zrumwana, ale je stejo wostała. To běchu sej tež wobydlerjo přeli. Hdyž je ćma a štom tak wobswětleny, je to wěste zarunanje.
Nad tym je so Waša mandźelska wjeseliła?
Wona měnješe, zo njemóže być, hdyž město wšo tak chětře zaso zrumuje. Wězo běše tam pozadnja mysl pódla. Wšako su ruske hody 6. januara a stary ortodoksny swjatk je 13. januara.
Kak so wobrazy po jednym lěće runuja!