W Zhorjelskim wobchodźe „Laba“ poskića Gerhard Zschau nimale bjezwuwzaćnje regionalne wudźěłki

Tójšto ze starodawnych zasydlenych wobchodow zwažichu w zašłym času krok do interneta, štož předewšěm na wobmjezowanjach koronapandemije zaležeše. Za nawopačny puć rozsudźi so Gerhard Zschau. Rodźeny Budyšan wotewri w lěće 2016 swój onlinowy shop „Laba“, w kotrymž nimale bjezwuwzaćnje z regionalnymi wudźěłkami wikuje. Nětko pak móža kupcy tež analognje pola njeho nakupować a to we wobchodźe na Zhorjelskej Suhrowej 17. W tamnišej štwórći z domami załožerskeho časa je swój wobchod 7. meje z małkim swjedźenjom wotewrił. Štyri dny pozdźišo móžeše hižo prěnich kupcow w nim witać. Běštaj to mandźelskaj, wobaj hižo na wuměnku, kotrajž staj nišich podružow dla před někotrymi lětami z Hamburga do Zhorjelca ćahnyłoj. Poprawom chcyštaj jenož na kofej přińć, tola naposled wuwi so čiła rozmołwa.