Gabriela Linakowa dwanaće lět społnomócnjena za Serbow we Wojerecach była – čas za pohlad wróćo- a doprědka
Wojerecy maja hłuboke serbske korjenje. Wučer Johann Kullmann wudźeržowaše wot 1850 prěnju serbsku ćišćernju w měsće. Tak wuchadźachu tam tež ćišćane twórby fararja a basnika Handrija Zejlerja (1804–1872). 1912 załožichu w měsće nad Čornym Halštrowom Domowinu. Wot lěta 1957 do 1971 bě we Wojerecach muzej za serbske ludowe wuměłstwo. „Na stawizny móže město horde być“, Gabriela Linakowa wuzběhuje. Wot lěta 2010 běše wona čestnohamtska społnomócnjena za Serbow we Wojerecach. We hłownym powołanju dźěłaše maćernorěčna Serbowka a dźensniša wuměnkarka wot lěta 1996 pola města jako wěcywobdźěłarka za financy a hospodarske naležnosće we wobłuku twarstwo, twarski dohlad, wuwiće města, twarjenja a ležownosće kaž tež wysoko- a hłubokotwar. Nětko je čas za bilancu. Z Gabrielu Linakowej rozmołwjał je so Andreas Kirschke.
Knjeni Linakowa, po dwanaće lětach přestanjeće jako społnomócnjena za Serbow, Diana Karbe Waše zastojnstwo přewozmje. Što Was hnuje při rozžohnowanju?
