ˆ
W dale a njewěsćišich časach je jara změrowace, zo mamy twjerdźiznu wěstoty: Serbski dom w Budyšinje. Tule su sčasom spóznali, zo su čłowječe truty najwjetši strach za nutřkownu wěstotu. Wone drje njelětaja, ale přilězu – gor hišće bjez připowědźenja – do rańšeje abo připołdnišeje přestawki, hdyž přistajeni domu swój kofej laptaja. Abo samo do běrowow a myla dźěło prócowarjow we winicy Serbstwa. Dźakowano pandemiji wšak je dołho porjad knježił: Hłowny zachod bě zamknjeny a na nim wšelake cedlki z pokiwami, čehodla spotanje do domu zastupić njemóžeš. Přetož dyrbješe so elementarnym stracham wobarać, na přikład bjezdomnym, kotřiž tu hdys a hdys na nuznik chodźachu abo sej ruce wumychu.