Z busom abo awtom na wšě 90 kilometrow na folklorny festiwal do Hochozy w Delnjej Łužicy jěć, hdyž maš folklorne skupiny w Chrósćicach takrjec před nosom? Na tu mysličku dyrbi so čłowjek najprjedy raz zwučić. Wopytowarjam lětušeho zazběha mjezynarodneho folklorneho festiwala we wsy sewjernje Choćebuza bě spěšnje jasne, zo ma zarjadowanje w Hochozy dale a wjace lubowarjow. Tole pokaza so hižo w busu Šmitec wozydłownistwa, kotryž bě Domowina organizowała. Nic mjenje hač 45 zajimcow z Radworja a Chrósćic je so dźens tydźenja z nim do Hochozy podało. Tam zwěsćichu, zo njeběchu sami. Cyła šwita ludźi z Hornjeje Łužicy bě přijěła.

Program běchu zamołwići na štyri statoki rozdźělili. Štož hnydom napadny, bě měrna a wurunana atmosfera. Wopytowarjo mějachu dosć městna a chwile, folklorne skupiny wobdźiwać a sej připódla kulinariske chłóšćenki słodźeć dać. Štóž nochcyše puće mjez statokami pěši na so wzać, móžeše konjacej zapřahaj wužiwać, kotrejž jako „shuttle“ městnosće wustupow swěrnje zwjazowaštej.