Serbski ludowy ansambl hotuje so na prapremjerje lětušeju ptačokwasneju inscenacijow. Wječorny program „Mjezy swětomaj“ předstaja zajutřišim prěni raz w Choćebuzu, premjera baletneje bajki za dźěći „Kiž je z wětrom přišoł“ slěduje dźensa za tydźeń w Chrósćicach. Bosćan Nawka je so z hrajerku Boženu Bjaršec, kotraž we woběmaj produkcijomaj sobu skutkuje, rozmołwjał.

Knjeni Bjaršec, po dlěšej přestawce nawróćiće so na serbske jewišćo. Kak je ke kooperaciji ze SLA dóšło?

B. Bjaršec: Loni w septembrje sym studij na Dźiwadłowej akademiji Předpomorska zakónčiła. Takrjec hnydom po tym je so tehdyša dramaturgowka SLA Jěwa-Marja Čornakec naprašała, hač nochcyła jednu z hłownych rólow lětušeho ptačokwasneho programa hrać. Nje­trjebach předołho přemyslować. Ansambl dźě je mi dosć bliski, wšako sym mjez druhim we wobłuku rjadu „Zynki a linki“ čitała a znaju choreografow ze Serbskeho folklorneho ansambla Wudwor. Jako swobodnje skutkowaca dźiwadźelnica móžach spěšnje připrajić a nětko čuju so kusk kaž doma.