Mjezynarodny folklorny festiwal je lětsa swój 15. jubilej woswjećił. Z wurězkami z nowin z lěta 1995 chcemy na spočatk tohole swjatka zhladować. Na tymle městnje dźakujemy so hłownym akteram Markej Kowarjej, Gabrielej Krawcej, Benej Jurkej, Claudiji Knoblochec, Janje Pětrowej, Tobiasej Ruchej a mnohim dalšim čestnohamtskim pomocnikam, kotřiž su so do nadawka dali, tónle swjedźeń organizować. Wuměnjenja před 30 lětami drje běchu cyle hinaše hač dźensa z pomocu interneta a digitalizacije.

Ideja festiwala zrodźena

Marko Kowar, nawoda přihotowanskeho komiteja: Ideja za tónle swjedźeń je hižo trochu starša. Předewšěm w poslednich lětach běchu serbske lajske skupiny wjele razow we wukraju – wosebje w susodnych słowjanskich krajach. W Smjerdźacej sej loni prajichu, zo by tola rjenje było, hdy by so folklorny festiwal tež w Serbach wuhotował. Tole so nětko stanje. Wšitko hłowne je spřihotowane.

(SN, 16. junija 1995)

Připowědź za I. mjezynarodny folklorny festiwal