Z rozpalitosću, pilnosću a wutrobu – koparska karjera Radworčanki Johany Wjeselic

Štóž je Johanu Wjeselic jónu na kopanišću dožiwił, hnydom pytnje: Tu steji młoda žona, kotraž z wutrobu za bulom honi. Rodźena Radworčanka wotkry hižo w młodych lětach swoju lubosć ke kopańcy a přesadźi ju z wjele rozpalitosću, pilnosću a zaměrnosću. Jeje koparska karjera započa so pola ST 1922 Radwor, hdźež steješe hižo ze štyrjomi lětami z bambinijemi na hrajnišću. „Hižo jako dźěćo sym pytnyła: Kopańca njeje za mnje jenož někajki hobby – ně, to je hižo wjace hač 11 lět moje žiwjenje“, wona powěda. W Radworju hraješe bjezwuwzaćnje z hólcami, na čož je dźensa wosebje horda. „Sym dźakowna za tutón čas, móžach sej ­wjele wothladać a wuknjech prawje kopańcu hrać.“ Po swojim času w Radworju změni k Biskopičanskej B-młodźinje w krajnej lize, hdźež zběraše dalše nazhonjenja. Wosebitosć bě, zo tam jenož z holcami hraješe. Tutón čas bě dobry zakład za sportowu šulu w Podstupimje, na kotrejž je tři lěta dołho trenowała a swoje sportowe kmanosće polěpšowała.