Syman Bjarš a Frank Wjesela staj 1996 kapału Blue Angels załožiłoj
Na jewišćowy jubilej přihotuje so aktualnje skupina Blue Angels. Štóž je před 30 lětami na reje chodźił, kwasował, narodniny abo druhi wjetši swójbny swjedźeń swjećił, so cyle wěsće hišće na wonu kapału wokoło Franka Wjesele a Symana Bjarša dopomina. Sobotu, 17. januara 2026 chcetaj wonaj z bywšej originalnej wobsadku skupiny a dalšimi hudźbnymi přećelemi w Šunowskej Fabrikskej hospodźe zhromadnje hudźbu tehdyšeho časa znowa zaklinčeć dać.
Prěnje kročele podobne
Započatki kapały Blue Angels leži pola rejwanskeje skupiny Serbskeho wjesneho ansambla Wudwor, w kotrejž staj Syman Bjarš (lětnik 1979), kiž bě w Smječkecach wotrostł, a z Chrósćic pochadźacy Frank Wjesela (lětnik 1980) zhromadnje jako młodostnaj rejowałoj. „W rejwanskej skupinje smój zwěsćiłoj, zo wobaj instrument hrajemoj a tuž sej prajichmoj, zo móhłoj to raz zhromadnje wuspytać“, dopomina so Syman Bjarš. Wón hraje gitaru, Frank Wjesela pak keyboard.
