Dorothea Michałkec naćisnje druhi króć šaty za debitantki Bala Semperoweje opery
Klětu w februaru je zaso tak daloko: Bal Semperoweje opery w Drježdźanach přeprošuje pod hesłom „Film ab! Einzigartig. Emotional. Elegant.“ na jedyn z najbóle swětosławnych towaršnostnych podawkow Sakskeje. Emocionalny wjeršk wječora je tradicionalnje reja debitowych porikow. Drasty młodych rejwarkow pochadźeja z ruki Drježdźanskeje modoweje designerki Dorotheje Michałkec, kotrejž bu hižo loni prěni raz nadawk přepodaty, design lětušeho šata naćisnyć. Tež za přichodny operowy bal 2026 je design šata hižo jasny.
