Towarstwo šulska a domizniska stwa w Ptačecach zhladuje lětsa na 25lětne wobstaće

Šulska a domizniska stwa w Ptačecach, kotraž je wot 2011 powšitkownowužitne a zapisane towarstwo, wobsteji mjeztym 25 lět. Přez cyły čas zahorjeja tam skutkowacy čłonojo wosebje dźěći, kotrež zhonja na awtentiske, mnohostronske a originelne wašnje wo stawiznach wsy kaž tež wo žiwjenju předchadźacych generacijow.

„Dobry dźeń“, Martina Pěčikowa, na­wodnica wjesneho muzeja „Šulska a domizniska stwa Ptačecy“, młodych při­posłucharjow serbsce wita. Viktoria, Emre,­ Jarik a dalše dźěći wuši nastajeja. Martina Pěčikowa so do koła praša: „Wěsće­ hižo, što móžeće w tajkej šuli wšitko činić?“ „Čitać“, „ličić“, „spěwać“, wołaja dźěći předšulskeje skupiny Wo­jerowskeje pěstowarnje Dźěłaćerskeho dobroćelstwa (AWO) „Raj hrow“. Wone su sej Ptačecy jako cil zakónčaceje­ „jězby do kraja cokorowych titow“ wupytali.