Dalše rizikowe kónčiny w EU
Baterije za awta bórze z Lipska
Lipsk (dpa/SN). Awtotwarc BMW chce produkciju baterijow za elektroawta w Němskej dale rozšěrić. Za to inwestuje koncern 100 milionow eurow do swojeje Lipšćanskeje twornje. Wot lěta 2021 chcedźa tam baterijowe module za wysokovoltowe baterije elektroawtow zhotowić, kaž nawoda twornje Hans-Peter Kemser wčera zdźěli. Hač do lěta 2022 ma w Lipsku wjace hač 150 sobudźěłaćerjow baterije twarić.
Wysokovoltowe baterije dóstawa BMW dotal z bayerskeho Dingolfinga kaž tež z USA a Chiny. Syć chcedźa wot 2021 z Lipšćanskim zawodom wudospołnić. Hižo klětu ma kóžde štwórte předate awto BMW elektrisce po puću być, 2030 połojca. W Lipsku twari BMW wot lěta 2013 elektriski model i3. Hišće w oktobru ma 200 000. awto tohole modela zawod wopušćić.
Maas a Altmaier w karantenje
Berlin (dpa/SN). Zwjazkowy wonkowny minister Heiko Maas (SPD) a hospodarski minister Peter Altmaier (CDU) staj so po móžnych kontaktach z ludźimi, kotřiž běchu so z koronawirusom natyknyli, do domjaceje karanteny podałoj. Maas dyrbi do domjaceje izolacije, dokelž běchu jednoho z jeho wosobinskich škitarjow pozitiwnje na wirus testowali. Altmaier měješe kontakt ze sobudźěłaćerjom europskeho ministra, kiž bu tohorunja pozitiwnje testowany, powěsćernja dpa rozprawja.
Prěni hnydomny test pola Maasa bě negatiwny, kaž wonkowne ministerstwo informuje. Nětko chcedźa zwěsćić, hač su dalše wosoby potrjechene. Tež pola Altmaiera njejsu natyknjenje dotal zwěsćili. „Sym so najebać to najprjedy raz do domjaceje karanteny podał. Mi so jara derje dźe“, Altmaier twitterowaše.
Kak dołho dyrbi Maas w karantenje wostać, njeje hišće znate. Poprawom chcyše so wón wčera popołdnju do jordaniskeje stoli Amman podać. Jězbu dyrbjachu krótkodobnje wotprajić.
Zwada eucharistije dla
Diskusija wo zhromadnym přistupje k blidu Božemu biskopow zaběra
Fulda (dpa/SN). Vatikan jenož na reformowy proces němskich katolikow kritisce njezhladuje, ale ma tež wulke wobmyslenja hladajo na zbliženje k protestantam zhromadny přistup k blidu Božemu nastupajo. Prezident Bamžowskeje rady k spěchowanju jednoty křesćanow, šwicarski kardinal Kurt Koch, warnuje němskich biskopow w rozmołwje z katolskim měsačnikom Herder Korrespondenz, w tymle prašenju swojowólnje postupować.
W diskusiji dźe wo to, hač smědźa so katolikojo a protestanća mjezsobnje k swjatemu woprawjenju respektiwnje k Božemu wotkazanju přeprosyć. To rěka, zo jedna z cyrkwjow eucharistiju swjeći, a wěriwi wobeju konfesijow so na njej wobdźěleja. To chcedźa mjez druhim na Ekumeniskim cyrkwinskim zjězdźe klětu w Frankfurće nad Mohanom praktikować.
Dale prošerjo?
Muzejebóle škitać
Berlin (dpa/SN). Hladajo na spektakularne padustwa je sej kulturna statna sekretarka Němskeje Monika Grütters (CDU) wěsta, zo njejsu muzeje najebać wšelake inwesticije na přiběrace wohroženja dosahajcy přihotowane. Je tuž nuznje trjeba wěstotne połoženje w muzejach dokładnje pruwować a tež do prašenja stajeć. W muzejach leža wuměłske drohoćinki, „kotrež su špihel našich stawiznow a kultury z wulkej materielnej a hišće wjetšej imaterielnej hódnotu“, rjekny Grütters we widejowym poselstwje wěstotnej konferency Němskeho muzejoweho zwjazka. Muzeje njemóža wěstotne směrnicy bankow spjelnić, dyrbja pak so tež brachialnej namocy a techniskim rafinesam kriminelnych wobarać móc.
Fachowcy chcedźa na konferency wuradźować, kak hodźa so eksponaty lěpje škitać a runočasnje zjawnosći přistupne wostać. Za to sej muzejownicy, kriminalni zastojnicy a wěstotni specialisća mysle a měnjenja wuměnjeja. Zeńdźenje je tež sćěh spektakularneho padustwa w Zelenym wjelbje Drježdźanskeho hrodu loni w nowembru, hdźež běchu njeznaći diamanty a brilanty rubili.
400 akcijow za lěpšu klimu
Berlin (dpa/SN). Hibanje Fridays for future planuje zhromadnje z dalšimi organizacijemi přichodny kónc tydźenja we wobłuku cyłoněmskeho protesta za škit klimy a za energijowu změnu na wšě 400 demonstracijow w Němskej, po wšěm swěće dobre 2 500. To je organizacija wčera w Berlinje zdźěliła. Tam ma so pjatk wopomnjenska straža při Braniborskich wrotach wotměć. Runočasnje wotmějetej so dwě demonstraciji kolesowarjow. Za zarjadowanje před Braniborskimi wrotami je Fridays for future 10 000 wobdźělnikow přizjewiło, nimo toho liča ze 4 000 kolesowarjemi.
Runje kaž koronakriza trjechi klimowa kriza předewšěm tych, kotřiž socialneje njesprawnosće dla ćerpja, praji rěčnik hibanja Quang Paasch. „Njedowolimy to a póńdźemy zaso na dróhu, zo bychmy přećiwo klimowej njesprawnosći protestowali.“
Kónc tydźenja planuja dalše zarjadowanja. Tak chce skupina „Ende Gelände“ zhromadnje z iniciatiwu wot wotbagrowanja wohroženych „Wšitke wsy wostanu“ z akcijemi ciwilneje njeposłušnosće za kónc zmilinjenja brunicy demonstrować.
To a tamne (24.09.20)
Dosć krótke bě wjeselo młodeje Španičanki nad nowej, w interneće skazanej ručnej tobołu z Chiny. Jako žona doma do tobołki přimny, ju něšto do ruki kałny. Nablaku da ju padnyć a widźeše, kak něhdźe pjeć centimetrow wulki skorpion z toški wulěze. Na zbožo bě bratr doma, wón skorpiona popadny, tykny jeho do škleńcy a ze žonu do chorownje jědźeše. Předawar njemóžeše sej rozkłasć, kak bě jědojte zwěrjo do tobołki přišło.
Bywše jastwo kupić móža zajimcy při internetnym přesadźowanju w Compiègne sewjerowuchodnje Parisa. Dotal poskićeja 1,5 milionow eurow za jastwo ze 19. lětstotka, kotrež běchu před pjeć lětami zawrěli. Stat jako wobsedźer objekta ze 4 000 kwadratnymi metrami płoniny bě sej 527 000 eurow žadał. Kupcy pak su warnowani: Bywše jastwo ma so dospołnje ponowić abo wottorhać.
Racije pašowanja ludźi dla
Berlin (dpa/SN). Z cyłoněmskimi racijemi je policija dźensa přećiwo organizowanemu pašowanju dźěłowych mocow do mjasoweje industrije postupowała. Ćežišćo akcije ležeše w saksko-anhaltskim Weißenfelsu a w delnjosakskimaj Twisće a Garbsenje. Něhdźe 800 zasadźenych zastojnikow přepytowaše wjace hač 40 bydlenjow a wobchodniskich rumnosćow. Wobskorženym firmam wumjetuja, zo su dźěłowe mocy z wuchodneje Europy z pomocu falšowanych dokumentow do Němskeje přiwjezli.
Awstriska wobskoržena
Wien (dpa/SN). Turisća z Němskeje, Awstriskeje a Šwicarskeje, kotřiž běchu so spočatk lěta w sněhakowarskim centrumje Ischgl z koronawirusom natyknyli, su Awstrisku a tamniši kraj Tirol wobskoržili. Wotpowědnu skóržbu chcyše awstriske towarstwo za škit přetrjebarjow dźensa na Wienskim krajnym sudnistwje zapodać. Při tym dźe wo to, potrjechenych wotškódnić a sćěhi infekcije připóznać. Wjace hač 6 000 dowolnikow, mjez nimi wjele Němcow, bě so hač do kónca awgusta pola towarstwa přizjewiło.
Nawalnyj z chorownje pušćeny
