Klimowa kista pře horcotu
To a tamne (08.08.25)
Atomowy reaktor na měsačku je w lěće 2030 bjeze wšeho móžny. Wo tym je němski swětnišćowy projektowy manager europskeho swětnišćoweho zarjada ESA, Markus Landgraf, přeswědčeny. Fachowcy hižo dołho tajke technologije wuwiwaja a spochi na tym slědźa, wón nowinarjam rjekny. Přiwšěm je sej wón wěsty, zo móhło wuwiće hižo dale być, bychu-li so móžnosće nuklearneje technologije lěpje wuzbytkowali.
Golden Retrievera z nuzy wuswobodźili su čłonojo hórskeje słužby w Awstriskej. Z pomocu helikoptera móžachu psycu sewjerorynsko-westfalskich dowolnikow wuchować, kotraž pak so při njezbožu ćežko zrani. Swójba bě w Vorarlbergu po horach po puću, jako so psyk druheje swójby do psycy da. Ta reagowaše strachoćiwje a padny 40 metrow do nahłeje hłubiny.
Měnjate wjedro minjenych tydźenjow w Hornjej Łužicy tež lěpšiny ...
Mjenje próstwow wo spěchowanje
Israel nadběhuje Libanon
Tel Aviv (dpa/SN). Israelske wójsko je po swójskich informacijach znowa zepěranišća Hisbollah na juhu Libanona nadběhowało. K tomu słušeja wšelake wojerske objekty wot Irana podpěrowaneje milicy, mjez druhim składy brónjow a stejišća raketow, wójsko w Tel Avivje zdźěli. Libanonske mediie rozprawjeja nimo toho wo nalětach na druhe objekty. Poprawom knježi w potrjechenej kónčinje přiměr mjez Israelom a Hisbollah.
Wyše cła přećiwo Indiskej
Washington (dpa/SN). Knježerstwo USA z prezidentom Donaldom Trumpom na čole je Indiskej přidatne cła 25 procentow napołožiło, dokelž kraj dale ruski wolij kupuje. Cła płaća wot 27. awgusta. Hač do toho chcył Trump z Indiskej „deal“ wotzamknyć. Tuchwilu dyrbi Indiska hižo cło 25 procentow za wšitke ekporty do USA płaćić. Nowe cła bychu sadźbu za Indisku podwojili. Indiska je připowědźiła, zo so hospodarskemu ćišćej Washingtona njepodwoli.
Protestuja přećiwo wukazej
Lětadła francoskeho ciwilneho škita spytaja hoberski lěsny woheń ...
Trump a Putin móhłoj so zetkać
Kontrole mjezow podlěša
Berlin (dpa/SN). Zwjazkowy minister za nutřkowne naležnosće Alexander Dobrindt (CSU) je připowědźił, zo chce pomjezne kontrole podlěšić. „Z pomjeznymi kontrolemi dale pokročujemy“, rjekny Dobrindt nowinarjam. Tež po septembru chcedźa na mjezach kontrolować a ilegalnych migrantow wotpokazać, wón rjekny.
Němska bě kontrole mjezow krótko po nastupje zwjazkoweho knježerstwa CDU/CSU a SPD w meji zesylniła. Tole bě w susodnych krajach masiwnu kritiku zbudźiło. Němska słuša k Schengenskemu rumej, w kotrymž su poprawom wšitke mjezy wotewrjene. Tež z wotsunjenjemi do Afghanistana a Syriskeje chcedźa pokročować, dokelž je to po słowach Dobrindta „nuznje trěbne“.
Nowe cła wot dźensnišeho płaća
Washington (dpa/SN). Wot prezidenta USA Donalda Trumpa wukazane wyše cła na importy z EU wot dźensnišeho płaća. Poprawom bě EU z toho wuchadźała, zo su cła hakle wot jutřišeho skutkowne. Trump pak je dźensa rano na swojej internetnej platformje potwjerdźił, zo płaća cła hižo wot dźensnišeho.
Nimo Němskeje je hišće 70 dalšich krajow wot nowych cłow potrjechenych. Trump wopodstatni swoju radikalnu cłownu politiku z pozdatnymi deficitami na njedobro USA. „Miliardy dolarow přińdu nětko do kasow USA, a to z krajow, kotrež su USA wjele lět znjewužiwali a kiž su so nam smjeli“, piše wón we wulkich pismikach.
Komisija EU bě so njedawno z USA na kompromis dojednała: Město wukazanych 30 procentow zniži Washington cła na 15 proc. Za to bě prezidentka komisije EU Ursula von der Leyen Trumpej přilubiła, zo EU dale běžity płun a wolij w USA kupuje. Nimo toho inwestuje EU 600 miliardow dolarow w USA. Trump ma to za wosobinski dar, „z kotrymž móže činić, štož chce“.
Z přilubjenja wjele njezwostało
Frakcija CDU/CSU je po prěnich sto dnjach knježerstwa njespokojna
Berlin (dpa/SN). W frakciji CDU/CSU w zwjazkowym sejmje jewi so přiběrajcy njespokojnosć ze swójskim dźěłom w knježerstwowej koaliciji CDU/CSU a SPD. Za hospodarsku a energijowu politiku zamołwity městopředsyda frakcije Sepp Müller (CDU) rjekny Frankfurtskim nowinarjam: „Smy we wólbnym boju z přilubjenjom nastupili, zo mjezu zadołženja zakitujemy – a z hesłom Carstena Linnemanna ‚prosće raz činić‘. Z toho njeje wjele zwostało. To pytnjemy tež na naledźe w frakciji.“
Müller, kotryž pochadźa ze Saksko-Anhaltskeje, skedźbnja w tym zwisku na wobćežne połoženje na wuchodźe: „Dopóznaće, zo jako byrgarska srjedźizna rozpadnjemy, hdyž prosće dale činimy kaž dotal, je na wuchodźe hižo wo pjeć lět dale.“ W Saksko-Anhaltskej wola klětu w septembru nowy krajny sejm. W uniji zhladuja starosćiwje na strach, zo móhła AfD tam po tym sama knježić.
