Moskwa (dpa/SN). Ruski powětrowy škit je po informacijach z Moskwy minjenu nóc zaso ukrainske nalěty z trutami nad stolicu wotwobarał. Dwaj trutaj su na kromje metropole wottřělili, ruske zakitowanske ministerstwo zdźěla. Pola třećeje su nawigaciski system mylili. Na to je lětacy roboter do hišće njedotwarjeneho objekta w Moskowskej běrowej štwórći zrazył. Samsnu štwórć běchu minjene tydźenje wospjet trjechili. Tež tónkróć bu fasada moderneho wysokodomu trjechena. Hač je powětrowy škit woprawdźe system wodźenja truta znješkódnił, njehodźi so přepruwować. Moskowske lětanišća Domedjedowo, Šeremetjewo a Wnu­kowo kaž tež wojerske lětanišćo Šukowski su po přetorhnjenju zaso dźěłać započeli. Při nadpadach ruskeje artilerije njedaloko ukrainskeho Lymana su třo wobydlerjo žiwjenje přisadźili.

Berlin (dpa/SN). Zwjazkowe knježerstwo chcyše dźensa prawidła za spěšniše spožčenje němskeho staćanstwa wobzamknyć. Kabinet měješe naćisk zwjazkoweje ministerki za nutřkowne naležnosće Nancy Faeser (SPD) na blidźe, kotrež mjezy zadomjenja zniža a zdobom wjacestatnosć dowola. Zasadnje maja migranća spěšnišo němski pas dóstać. Tole je pak z wuměnjenjemi nastupajo hospodarsku a demokratisku integraciju zwjazane. Čas čakanja na němski pas chcedźa wot wosom na pjeć lěta znižić. Zapósłanc Zelenych Konstantin Notz kritizuje nowy zakoń jako njesprawny, dokelž wón ludźi wuzamkuje, kiž su na socialnu pomoc stata pokazani, kaž samostejace maćerje.

Berlin (dpa/SN). W boju wo lěpše wuměnjenja za plahowanje skotu so wjele wobkedźbowana komisija fachowcow rozpušći. Gremij wokoło bywšeho zwjazkoweho ministra za ratarstwo Jochen Borcherta (CDU) je wčera wobzamknył, swoje dźěło skónčić, ministerstwo zdźěla. We wotpowědnym stejišću komisija rozłoži, zo njejsu wuměnjenja za wuspěšne dźěło ani w bywšej ani w prěnimaj lětomaj tuteje wólbneje doby stworjene byli. „Tež w naćisku zwjazkoweho etata 2024 njeje trěbny rozmach spóznajomny“. Tohodla komisija swoje dźěło skónči, zdźělichu.

„Kompetencna syć k plahowanju wužitneho skotu“ bě hižo 2020 koncept za poněčimny přetwar plahowanja k jasnje wyšim směrnicam předpołožiła. W tym zwisku žadachu sej srědki wjacorych miliardow eurow, zo njebychu ratarjo kóšty přetwara sami njesć trjebali. Amplowa koalicija bě jednu miliardu eurow zaplanowała, wojuje pak hižo měsacy wo dalše dołhodobne financowanje.

Dobra rada móže druhdy chětro droha być. Tole je zwjazkowe knježerstwo hižo wospjet dožiwiło. Myslu jenož na bywšu zakitowansku ministerku Ursulu von der Leyen (CDU), kotraž je wjele pjenjez za eksternych fachowcow wudała a kotraž je namjety fachowcow rady sćěhowała. Njezapomnita je tež nowinarska konferenca tak mjenowaneje wuhloweje komisije w januaru 2019. Z hoberskim nawalom medijow sedźeše cyły kraj napjeće před wobrazowkami, zo by słyšał, što nam fachowcy nastupajo skónčenje zmilinjenja brunicy a z tym zwjazane kóšty namjetuja. Jich słowa zańdźechu bjez wulkeje diskusije kaž do zornowca dypane do dźěłoweho plana tehdyšeho knježerstwa.

Porno tomu je komisija za lěpše wuměnjenja při plahowanju skotu skerje ćichu smjerć zemrěła. Gremij fachowcow njeje so ze swojimi namjetami a scyła nic z financnymi předstawami přesadźić móhł a je zrezignował. Snano njebě jich dźěło spektakularne dosć. Marko Wjeńka