Mjenje truskalcow a hromaka žnjeli
Wiesbaden (dpa/SN). Žně truskalcow a hromaka w Němskej su lětsa tak špatne kaž dołho nic wjace. Pola truskalcow wočakuja ratarske zawody po prěnich trochowanjach z něhdźe 84 700 tonami najniši wunošk pod hołym njebjom po lěće 1998, statistiski zwjazkowy zarjada dźensa zdźěla. Mnóstwo hromaka trochuja na 105 700 tonow. To by najniše mnóstwo žnjow po lěće 2013 było. Přičiny wuwića je po měnjenju Wiesbadenskich statistikarjow woteběrace naprašowanje powšitkownje přiběracych płaćiznow dla a chłódne wjedro w nalěću, čehoždla su žně zdźěla pozdźišo zahajili hač hewak.
Wunošk truskalcow je po dotalnych ličbach wo 14 procentow niši hač w tak a tak hižo špatnym lěće 2022 z 98 500 tonami. W lětomaj 2017 do 2022 su na polach Němskej štwórćinu wjace čerwjenych płodow našćipali hač lětsa.
Wobkedźbować so při tym měło, zo su ratarske zawody přiběracych produkciskich kóštow dla płoninu plahowanja truskalcow wo sydom procentow znižili, pola hromaka wo štyri procenty.
Směrnicy za horcotu trěbne
Dźěłarnistwa a starši žadaja sej cyłoněmske rjadowanja w šulach
Berlin (dpa/SN). Hdy rěka w šuli „Horcoty dla swobodne!“? Jednotne směrnicy za to w Němskej nimaja. Dźěłarnistwa a zastupnicy staršich žadaja sej powšitkownje płaćiwe prawidła a wočakuja hladajo na wočakowane horce lěća w přichodźe nimo toho cyłkownje lěpši škit přećiwo horcoće.
„Dyrbimy so přiběracym temperaturam, kotrež so nam w zwisku ze změnu klimy bliža, prewentiwnje wobarać“, rjekny Anja Bensinger-Stolze wot předsydstwa dźěłarnistwa kubłanje a wědomosć powěsćerni dpa. Zastupowacy předsyda zwjazka kubłanja a wotćehnjenja Tomi Neckow žada sej puće, „najhorcyše dny šulerkam a šulerjam kaž tež wučerkam a wučerjam znjesliwiše sčinić“.
„Dźensa kóždy zwjazkowy kraj sam rjaduje, hdy smědźa šulerjo horcoty dla domoj hić“, rjekny Bensinger-Stolze. Častodosć je to šulam přewostajene. „Tule bychmy jednotne rjadowanja witali, z kotrymiž bychu šulerjo při wěstych temperaturach wuswobodźeni byli.“
Załožba a kubłanje
Porjedźenka
To a tamne (20.07.23)
Swojej wowce žiwjenje wuchowała je štyrilětna holčka w Bayerskim Kissingu. 59lětna diabetikarka bě w swojim bydlenju do womory padnyła. Na to dźěćo z programěrowanym mobilnym telefonom swoju mać zawoła, kotraž policiju a wuchowansku słužbu alarmowaše. Wowku zastarachu hišće w bydlenju. Holčka dósta jako myto małeho barika.
Chětro napiteho šofera wosoboweho awta bjez jězbneje dowolnosće je policija na awtodróze A4 pola Drježdźan lepiła. Swědcy běchu policiju informowali, po tym zo běchu awto wobkedźbowali, kotrež po seklojtej čarje jědźeše. Policisća podhladne awto wuslědźichu a z awtodróhi přewodźachu. Test alkohola pola 35lětneho wunjese 2,5 promilow. Jězbnu dowolnosć wón njewobsedźeše.
Trump liči ze skóržbu
Washington (dpa/SN). Bywši prezident USA Donald Trump z tym liči, zo jeho w zwisku z namócnym wobsadźenjom parlamenta USA 6. januara 2021 bórze wobskorža. Wurjadny zwěsćowar Jack Smith bě jeho w lisće minjenu njedźelu informował, zo přećiwo Trumpej přepytuja a zo ma so wón pola gremija sudnikow přizjewić, Trump wčera zdźěli. Wón ma přepytowanja přećiwo njemu za politisce motiwowane. Trump chcył klětu k wólbam prezidenta znowa nastupić.
Zwjazkarjo Ruskeje so přesadźili
Brüssel (dpa/SN). Prěnje wulke zetkanje EU z łaćonskoameriskimi a karibiskimi statami po wosom lětach je so wčera z eklatom skónčiło. Z Ruskej zwjazane kraje kaž Nikaragua, Venezuela a Kuba su na dwaj dnjej trajacym zeńdźenju w Brüsselu přesadźili, zo w deklaraciji k wójnje w Ukrainje Rusku njezasudźa a ani njenaspomnja. Zwjazkowy kancler Olaf Scholz (SPD) rěčeše najebać to wo „wulkim wuspěchu“, dokelž su kraje připóznali, zo jedna so wo nadpadnisku wójnu.
Herzog wosłabja wobmyslenja
Ćežke njewjedra su wčera w Awstriskej zachadźeli. W Tirolu a ...
Trjebaja dale a wjace miliny
Paris (dpa/SN). Mjezynarodna energijowa agentura (IEA) z toho wuchadźa, zo potrjeba energije po wšěm swěće lětsa jenož wo něšto mjenje hač dwaj procentaj přiběra. Přičinje stej trajace słaba konjunktura kaž tež wuskutki energijoweje krizy w industrijnych krajach, IEA dźensa w Parisu zdźěli. Budu-li wuhlady zaso lěpše, wočakuja stopnjowanje naprašowanja za milinu wo 3,3 procenty.
Ćěrjene je přiběrace naprašowanje za energiju po rozprawje IEA předewšěm přez elektrifikowanje wo wobłuku prócowanjow, wustork škódnych maćiznow znižić. Nimo toho ludźo w horcych časach wjace klimowch připrawow wužiwaja, štož přetrjebu miliny přidatnje pospěša. K tomu přińdźe „robustnje“ přiběrace naprašowanje za energiju w prohowych a wuwićowych krajach. Byrnjež potrjeba miliny přiběrała, je wutwar syće wobnowjomnych energijow na najlěpšim puću, cyłkownu přidatnu potrjebu zmištrować. Klětu móhło so prěni króć stać, zo po wšěm swěće wjace miliny z wobnowjomnych energijow produkuja hač z wuhla.
Klawsura CSU ze Söderom a Merzom
Andechs (dpa/SN). K zahajenju lětnjeje přestawki su so zapósłancy CSU w zwjazkowym sejmje dźensa hišće raz na dźeń trajacu klawsuru zetkali, tónkróć w hornjobayerskim klóštrje Andechs. Na zarjadowanju witachu předsydu CSU Markusa Södera a předsydu CDU Friedricha Merza. Ćežišćo wuradźowanjow běchu bližace so wólby krajneho sejma w Bayerskej a Hessenskej 8. oktobra. Tole tež dalše politiske rozestajenje z amplowej koaliciju w Berlinje steješe na dnjowym porjedźe. Mjezynarodny hósć bě litawska ministerska prezidentka Ingrida Simonyte.
Do klawsury je šef krajneje skupiny CSU w zwjazkowym sejmje Alexander Dobrindt zwjazkowe knježerstwo SPD, Zelenych a FDP raznje kritizował. „Ampla je koalicija bjezrespektnosće. Tomu chcemy so ze swojej agendu respekta spřećiwjeć“, rjekny Dobrindt dźensa w rozhłosu. Wón šwikaše, zo Němska hladajo na rozrost a hospodarsku móc woteběra, mjeztym zo so swět dale wuwiwa. Tež w klimowej politice je Němska na wopačnym puću, Dobrindt měnješe. Ampla chcyła klimu ze słabym hospodarstwom wuchować. „Nawopačny kurs by prawy był.“
