Přihotowanska hra skónčnje njerozsudnje wušła

Dienstag, 11. August 2020
Artikel bewerten
(0 Stimmen)
Mustwo Njebjelčanskeje SJ, zastupjer Zapadołužiskeho koparskeho zwjazka, je z Lok Slepom z Hornjołužiskeho koparskeho zwjazka, test přewjedł a njerozsudny wuslědk docpěł. Tu nadběhuje wrota hosći Robert Lejnart (srjedźa).  Foto: Jörg Stephan Mustwo Njebjelčanskeje SJ, zastupjer Zapadołužiskeho koparskeho zwjazka, je z Lok Slepom z Hornjołužiskeho koparskeho zwjazka, test přewjedł a njerozsudny wuslědk docpěł. Tu nadběhuje wrota hosći Robert Lejnart (srjedźa). Foto: Jörg Stephan

SJ Njebjelčicy – Lok Slepo 3:3 (2:0)

Zestawa domjacych: Hahn – Kral, Ha­nuza, Šołta (46. Hrjehor), Domš, Čornak (46. Reinelt), Haška (46. Lejnart), Hölzel, Plaettner, Wagner (46. Reinecke), Korjeńk

Za Lok Slepo hrajachu: Knox – Dokter, Schurmann, Kuhnert, Koschel, Knaack, Kästel, Sonnert, Schuster, Michlenz, Zuchold, Bläse, Kuhnert, Marusch

Zazběh do druheje přihotowanskeje hry koparjow Sportoweje jednotki Njebjelčicy (SJN) bě dy­namiski, hinak pola hosći. Popołdniše słónco mjenujcy na hrajnišćo smaleše, tuž hrajerjo wotpowědnje z bulom wobchadźachu. Hosćo ze Slepoho wolachu měrny natwar z defensiwy. Wotměnjejo posłužachu woni z defensiwy centrum a hrajerjow na kři­dłomaj. Wotmołwa domjacych pak bě sylny pressing, z kotrehož bórze prěnje płody nastachu. Oliver Domš po zdobytym bulu w srjedźnym polu na wonkownej čarje přeběža a wotzamkny, ale třěli bul jenož do won­kow­neho saka (9.). Pjeć mjeńšin pozdźišo nasta podobna situa­cija w srjedźnym polu. Wiliam Plaettner bě kulowatu kožu na wonkownu čaru wotedał. Přeběžacy Domš bul ze za­kład­neje linije nisko do šěsnatki wotpołoži, a tam čakacy Plaettner jón jenož­ hišće z dźewjeć metrow do pra­weho kuta suny (14.). Slepjenjo pyta­chu swójski puć na wrota. Wosebje přez sylnje agěrowacy centrum sej rumy wuspěšnje zdobywachu. Dawid Sonnert a Jonas Michlenz tam solidnje zhromadnje skutkowaštaj, Daniel Kral na wonkownej čarje pak nadbě­hi přeco zaso wotwobara. Na tamnej stronje pósła Gabriel­­ Čornak něšto razow z dołhej třělwu Domša na wonkownej čarje, tola bjez dalšeho wuspěcha. Wotewzaćeljo w centrumje njeběchu po přihrawkach do šěsnatki na prawym městnje. W 35. min. wužiwachu domja­cy swoju dominancu za druhe wrota. Po přihrawce Handrija Korjeńka bě Jurij Haška na městnje a třěli bul wrotarjej mjez nohomaj do syće (38.). Tróšku měrnišo bu do přestawki. Horcota ko­parjam widźomnje mocy rubješe. Njebjelčanam so hišće trójce wotzamknjenje z distancy poskići, ale Leopold Hölzel a Jakub Šołta klětku snadnje misnyštaj.

Za druhi połčas dojednaštaj so trenar SJN Handrij Krawčik a kotrenar Daniel Ričel na alternatiwnu zestawu. Přez změny­ w defensiwje a centrumje trje­baše mustwo swój čas so zahrać, a na­stawace rumy wužiwachu hosćo. Po wudobytym bulu w połojcy Slepjanow přihra­ jón Jonas­ Michlenz Maximilianej Kä­stelej. Tón běžeše sam na wrotarja a bul nimo njeho do saka suny (47.). Dwě mjeńšinje pozdźišo dósta Kästel hrajny nastroj z centruma na nohu. Tónraz jón z wušiknosću wyše z wrotow spěchaceho Nica Hahna zběhny a tak we wrotach k 2:2 zaměst­ni. Mustwo wokoło kapitana Ronnyja­ Hanuzy da spěšnu wotmołwu. Plaettner trjechi k nawjedowanju 3:2 (54.). Na tamnym boku čakaše Kästel stajnje w nimohrě stejo na přihrawki, z čimž žane­ dalše strašne akciju njenastachu. Njebjelčenjo předrěchu so přez Šołtu na wonkownej čarje a z Robertom Lejnartom w nadběhu přez lěwu stronu do přećiwniskeje šěsnatki. Wrota pak wuwostachu. W 79. min. sej Slepjanska defensiwa na wysokosći swójskeje šěsnatki bul zdoby. Wottam dźěše nadobo spěšnje, a nadběhowar Benedikt Schuster k 3:3 nisko přetwori. Naposledk su sej hosćo ze Slepoho tak hišće hru na njerozsudny wuslědk zwjertnyli. Na woběmaj bokomaj so hižo žane strašne situacije njejewjachu. Chětro mjerzaca pak bě za Njebjel­čanow njetrjebawša njekedźbliwa scena mjez Slepjanskim koparjom a wrotarjom Hahnom, kiž dyrbješe na to z bolosćemi w noze z hrajnišća. Tež hdyž hosćićeljo swoju dobru hrajnu nitku hač do kónca hry dźeržeć njemóžachu, běchu fanojo dohromady z wuslědkom a wukonom domjacych spokojom. Jurij Haška

Veröffentlicht in Sport
Bitte anmelden, um einen Kommentar zu posten

Anzeige