Serbskej dwójce na zwjazkowym championaće młodych konjow we Warendorfje

Jónu wob lěto, zwjetša prěni kónc tydźenja w septembrje, lětsa pak kónc awgusta, zetkawa so němska elita młodych konjow ze swojimi jěcharkami a jěcharjemi we Warendorfje w Sewjerorynsko-Westfalskej. Hač do njedźele wotměwaja so na tamnišim arealu němskeho konjaceho zwjazka titulne mišterstwa młodych pjeć- do sydomlětnych konjow. Mjez tysacami štyrinohačow stej tež lětsa zaso serbskej konjej. To stej pjećlětna, z Miłoćic pochadźaca kobła Dobra9 a runje tak stary walach Valdini4 z Chrósćic. Wobaj so we Warendorfje w mnohostronskim jěchanju wubědźujetej.

Hižo wutoru rano je Pětr Bobka ze swojej žonu Frideriku a kobłu Dobru do němskeje stolicy konjaceho sporta, do Warendorfa wotjěł. „Smy so rozsudźili, so hižo tróšku zašo na puć podać. Do Warendorfa wšak je něšto wjace hač 560 kilometrow. Dokelž móžeš z připowěšakom jenož 100 kilometrow na hodźinu jěć, njetraje jězba jenož šěsć hodźinow, ale sydom“, tak Pětr Bobka. Nimo toho njeje wjacehodźinska jězba po kraju jenož za čłowjeka napinaca, ale tež za skoćo. Tež z tuteje přičiny běchu Bobkecy hižo spočatk tydźenja do směra na zapad wotjěli, hačrunjež su so poprawne wubědźowanje hakle dźensa dopołdnja zahajili. „Smy zawčerawšim nawječor do kónčiny Warendorfa dojěli. Zo by so kóń wot jězby tróšku wotpočnył, smy jeho jednu nóc pola přećelow do konjenca stajili. Wčera, srjedu, smy potom na wubědźowanišćo přijěli a naša Dobra je runja tamnym konjam swój domicil w jednym z wjacorych wulkich stanow, w kotrychž su konjace boksy, přirjadowany dóstała.“

HZ Njedźichow –

ST Marijina hwězda 0:1 (0:1)

zestawa hosći: D. Matik – Luk. Hoge, R. Cyž, K. Pakoßnick, E. Zynda (68. D. Leppers) – E. Bulank, T. Jurš, J. P. Kuring (77. F.-E. Schulze), Ch. Cyž – J. Pakoßnick (65. F. Nagmatov), Fr. Bulank

Po špatnym zazběhu tydźenja doma chcychu hrajerjo trenarja Kaija Frenzela w druhej hrě lěpje hrać a ju dobyć. Hač na někotre njestrašne móžnosće so w prěnjej połojcy prěnjeho přechoda ničo dale njesta. Potom pak dóstachu domjacy po dołhim bulu stoprocentnu šansu. Frederik Lück zdoby sej na lěwym křidle bul, na wrotarju Davidźe Matiku pak zwrěšći. Třělwu z kromy šěsnatki Nowosličan z cyłym ćěłom wotwobara (23.). Tež šěsć mjeńšinow pozdźišo běše wón při strašnej flance na městnje. Po 32 mjeńšinach dóstachu tež klóšterscy koparjo šansu. Po dołhej přihrawce Christofa Cyža na Jakoba Pakoßnicka so wón sam před wrotarjom wuspyta, ale kulu snadnje nimo wrotow sadźi.

ST Hnašecy/Dobruša –

SJ Chrósćicy 1:2 (0:1)

Zestawa hosći: M. Cyž – Rätze, B. Cyž, Kral-Zahrodnik, Mark, Donat (72. Bjeńš), Hawš, Žur, L. Zahrodnik, Bogusz (90. Wićaz), Graf (70. Wornar)

Na druhim hrajnym dnju běchu Chróšćenjo z hosćom pola lońšeho mištra w Dobruši. Runja jim běchu tež domjacy z poražku do noweje hrajneje doby startowali.