Zwjazkowe knježerstwo ma antisemitiske wukročenja za wohańbjace

Berlin (dpa/SN). Zwjazkowe knježerstwo antisemitiske wukročenja na demonstracijach přećiwo konfliktej mjez Israelom a milicu Hamas w Gazaskim pasmje raznje kritizuje. „Štož bě minjene dny na hidźe přećiwo Židam a na antisemitiskich ranjenjach słyšeć, je wohańbjace“, praji rěčnik knježerstwa Steffen Seibert wčera w Berlinje. Kóždy demonstrant dyrbjał jasnje rozeznawać mjez kritiku nastu­pajo politiku stata Israel, kotruž smě kóždy zwuraznić, a wuprajenjemi, „kotrež njemóžemy na žadyn pad akceptować, mjenujcy hidu a agresiju přećiwo Židam a israelskemu ludej“. Hladajo na eskalaciju konflikta mjez Israelom a palestinskej Hamas su minjeny kónc tydźenja tysacy ludźi w němskich městach na dróhu šli, zo bychu swoju solidaritu z Palestinja­nami zwuraznili. Dalša přičina bě kóždolětny wopomnjenski dźeń 15. meje, we wobłuku kotrehož dopominaja Palestinjenjo na wuhnaće z teritorija pozdźišeho Israela 1948. Při demonstracijach bě k wukročenjam a namócnosćam dóšło. Najćeše krawale běchu w Berlinje.