Budyšin (dpa/SN). Po wukročenjach na protestach zawčerawšim w Budyšinje žada sej zapósłanča Lěwicy w sakskim krajnym sejmje Kerstin Köditz zakaz prawicarskeje strony Freie Sachsen. Strona wšitke kriterije spjelnja, zo móhł sakski minister za nutřkowne naležnosće Roland Wöller (CDU) jednać, zapósłanča w socialnej syći Twitter wozjewi. Wobsadka policije njebě na njedowolenych protestach w dosahacej měrje wobsadźena a bě přežadana. Stat swój monopol z ruki da. „Tu wuspytuja so w byrgarskej wójnje. Hewak ničo“, Köditz wuzběhny.

Šef frakcije Lěwicy w sakskim krajnym sejmje Rico Gebhardt w syći tohorunja protesty wótrje kritizuje. Jelizo tysacy ludźi w Sakskej za neonacijami běža, potom ma Swobodny stat wulki problem. „Po podawkach njemóže hižo nichtó twjerdźić, zo ludźo njewědźa, što činja. Woni to cyle dokładnje wědźa“, Gebhardt podšmórny.