Berlin (dpa/SN). Wukazanje powšitkowneje winowatosće šćěpjenja přećiwo koronawirusej je w zwjazkowym sejmje dale horco diskutowana tema. W prěnjej wobšěrnej debaće wo tymle towaršnostnje brizantnym prašenju su měnjenja přiwisnikow a přećiwnikow do so zrazyli. Prominentni přiwisnicy kaž Karl Lauterbach (SPD) widźachu w tym jenički puć, pandemiju přewinyć.

Přećiwnicy, kaž wiceprezident zwjazkoweho sejma Wolfgang Kubicki a Gregor Gysi wot Lěwicy, maja šćěpjensku winowatosć za njekmanu, njepoměrnu a strašnu za dowěru ludźi do demokratije. W naležnej, ale w dalokej měrje wěcownej ­debaće bě jenož AfD zasadnje přećiwo winowatostnemu šćěpjenju.

Minister Lauterbach zasadźowaše so doraznje za šćěpjensku winowatosć a warnowaše před tym, naležnosć dale wotstorkować. Šćěpjenje móhło ludźi před přichodnej žołmu infekcijow w nazymje škitać, wón rjekny.

Tež přećiwnicy winowatostneho šćěpjenja, kaž Wolfgang Kubicki, wuznachu so wuraznje k šćěpjenju. „Mamy dobre argumenty za šćěpjenje. Te za winowatostne šćěpjenje pak mje njepřeswědčeja.“