Serbow wosebje boli, zo jedyn słowjanski stat tamny nadpaduje

Moskwa/Kijew/Berlin/Budyšin (dpa/SN). Ruska je wójnu přećiwo Ukrainje zahajiła. Prezident Wladimir Putin bě dźensa rano wojersku operaciju w regionomaj Donjeck a Luhansk wukazał. Wo nalětach z wojerskimi lětadłami a raketami přećiwo wojerskej infrastrukturje rozprawjachu tež z dalšich kónčin Ukrainy. Powěsćernja dpa pak na to skedźbnja, zo njehodźa so rozprawy njejasneho połoženja dla hnydom přepruwować. Prěni raz po wosom lětach sej tuž ruscy a ukrainscy wojacy napřećo steja.

Wladimir Putin rěči w ruskej telewiziji „wo wosebitej wojerskej operaciji. Jeje zaměr je škit ludźi, kotřiž su wosom lět krjudowanju a genocidej wusadźeni.“ Ruska prócuje so wo demilitarizaciju a denacifikaciju Ukrainy.