Berlin (dpa/SN). Zwjazkowa wonkowna ministerka Annalena Baerbock je baltiskim krajam Letiskej, Estiskej a Litawskej hladajo na rusku inwaziju w Ukrainje sylnišu podpěru přilubiła. „Smy zwólniwi, so hišće bóle za wěstotu swojich partnerow zasadźeć“, rjekny politikarka Zelenych dźensa do wotlěta k tři dny trajacemu wopytej do Letiskeje, Estiskeje a Litawskeje. Nadrobnosće wona njemjenowaše. Wona pak potwjerdźi: „W nuzy kóždy kwadratny centimeter swojeho zhromadneho zwjazkarskeho teritorija zakitujemy.“ Tak ma zwjazkowa wobora hižo nětko w Litawskej nawodnistwo tamnišeje zasadźenskeje jednotki NATO. W letiskej stolicy Rize wočakowaše němsku wonkownu ministerku jeje kolega Edgars Rinkēvičs. Tež rozmołwa z ministerskim prezidentom Krisjanisom Karinsom bě planowana. Popołdnju chcyše so Baerbock na wuradźowanju wonkownych ministrow třoch baltiskich krajow wobdźělić. Ministerka nowinarjam rjekny, zo móže Němska wot baltiskich krajow wjele wuknyć.