Premjera nowych ewangelskich spěwarskich „Zernička“ budźe 2. adwenta w Budyšinje. Wo tym je Serbski wosadny zwjazk informował. Před štyrjomi lětami zrodźichu mysl za projekt.

Budyšin (SN). Nowe serbske ewangelske spěwarske „Zernička“ změja na druhej adwentnej njedźeli na Michałskej farje w Budyšinje swoju premjeru. Po kemšach w 14.30 hodź. w Michałskej cyrkwi předstaji so na slědowacej adwentničce zběrka z wjace hač sto načasnymi kěrlušemi kaž tež z modlitwami za dźěći a mło­dźinu zjawnosći. Mjez druhim předleži w „Zerničce“ znaty němski kěrluš „Von guten Mächten“ Dietricha Bonhoeffera prěni raz w hornjoserbskim přełožku. Ilustrowała je „Zerničku“ w Serbach znata grafikarka a molerka Jutta Mirtschinowa. Po­date gitarowe akordy kaž tež přimkowa tabulka zmóžnja lochki instrumentalny přewod kěrlušow.

„Spěwnik budźe w přichodźe naše swójbne dźěło wobohaćić“, rjekny njedawno předsyda Serbskeho ewangelskeho towarstwa (SET) Mato Krygaŕ w tutej nowinje wo nowych spěwarskich, kotrež chcedźa zaměrnje tež na zarjadowanjach za swójby wužiwać.