Grünheide (dpa/bb/SN). Ze spočatka měrca tutoho lěta produkuje Tesla swoje awta w nowych twornjach w Grünheidźe blisko Berlina, w swojej t. m. gigafactory. Nětko planuja dalši wutwar. Něhdźe 200 wobydlerjow gmejny Grünheide su zašłu sobotu přećiwo tomu demonstrowali. Woni njekritizuja jenož planowany wutwar twornjow, ale tež njedodźerženje wobswětowych standardow a dale pokročowace zničenje lěsow.

„Proces zasydlenja Tesle běše dospołnje njedemokratiski“, praji gmejnski ­zastupjer Thomas Wötzel. „Žadamy sej, wobydlerstwo bóle do gmejnskich pla­nowanjow zapřijeć.“ Towarstwa a wobswětowe zwjazki maja dwěle, hač wobswět tajki wutwar scyła znjese. „Za to trjebamy procedury za rjadowanje kra­jiny“, žada sej Sven Rothmaier, rěčnik ­Zeleneje ligi Braniborskeje. „Dalši schodźenk wutwara je zwjazany z wutwarom infrastruktury. Tež nowe trěbne mnóstwo wody njeje znate.“