Załožbowa rada: „Zelenu swěcu“ za runostajenje serbskeho nakładnistwa

Lubin (SN/mb). „Lětdźesatki stare žadanje předewšěm serbskich nowinarjow je spjelnjene“, wjeseleše so direktor Załožby za serbski lud, Jan Budar. Załožbowa rada je na swojim posedźenju štwórtk w Lubinje Ludowemu nakładnistwu Domowina (LND) za přichodne lěta přidatnje 336 000 (2023) do 352 000 eurow (2025) k dispoziciji stajiła, zo by mzdu přistajenych LND niwowej druhich serbskich institucijow přiměriło. Nětko ma serbske nakładnistwo na zakładźe wopisanja jednotliwych dźěłowych městnow zastopnjowanje po regulach zjawneje słužby přewjesć, kotrež tež w druhich serbskich institucijach maja. Tute zastopnjowanje budźe so eksternje přepruwować, doniž so mzda na nowym niwowje njepłaći.