To a tamne (14.07.20)
Kóčku z marmeladoweje škleńcy wuswobodźiła je policija w badensko-württembergskim Ellwangenje. Micka tčeše z hłowu w škleńcy a njemóžeše so hižo wuswobodźić. Muž bě ju na dróze namakał. Zastojnicy přińdźechu na pomoc a škleńcu kedźbliwje rozbichu, zo bychu štyrinohača wuswobodźili. Na zbožo so tón při tym njezrani.
Awto z 39 ptačkami a dźewjeć młodymi kóčkami je policija w Braniborskej zadźeržała. Zastojnicy 69lětneho sobotu wječor na zwjazkowej dróze pola Seelowa kontrolowachu, dokelž bě zdźěla seklojtu čaru jěł. Muž rjekny, zo bě ptački na přehladce w Pólskej kupił. Kupne zrěčenje pak njemóžeše předpołožić. Kóčki běchu jemu darili, kaž twjerdźeše. Zastojnicy dowjezechu ptački a kóčki do zwěrjatownje. Weterinarny zarjad nětko móžne ranjenje zakonjow pruwuje.
Cyrkej dobyća poswjećena
Moskwa (B/SN). Srjedź junija je patriarch Kyril třeću najwjetšu katedralu Ruskeje jako Cyrkej dobyća poswjećił. Wona ma słužić dopomnjeću na Druhu swětowu wójnu. Pod 100 metrow wysokej złoćanej kuplu ma 6 000 ludźi městno. Ke katedrali wjedźe 1 418 metrow dołha hasa – telko dnjow traješe wójna sowjetskeho wójska přećiwo Němskej. Na multimedialnych monitorach podłu puća móža sej wopytowarjo fota wobhladać a čitać mjena 33 milionow sowjetskich wojakow, kotřiž su we wójnje wojowali. W rusko-ortodoksnej cyrkwi maja wojerske cyrkwje dołhu tradiciju.
Kubłanska kriza so přiwótřa
Genf (B/SN). Na 1,2 miliardźe dźěći po cyłym swěće njemóžetej po informaciji UNICEF koronapandemije dla hižo do šule chodźić. Dokelž nimaja mnohe z nich žadyn přistup k internetej abo k druhim medijam, zo móhli sej samostatnje wučbnu maćiznu přiswojić, so globalna kubłanska kriza dale přiwótřa. Tak rozprawja dźěćacy pomocny skutk, w kotrymž so tež křesćenjo čestnohamtsce angažuja. Po analyzy UNICEF ma w 74 mjez 127 krajemi swěta mjenje hač połojca ludnosće přistup k internetej.
Wustajeja wobrazy Raffaela
Warnuje před nowej žołmu
Berlin (dpa/SN). Minister za strowotnistwo Jens Spahn (CDU) ludźi warnuje, zwjeršnje z koronapandemiju wobchadźeć, a namołwja jich, škitne naprawy dale dodźeržeć. „Strach druheje žołmy je woprawdźity“, rjekny Spahn dźensa na zhromadnej nowinarskej konferency z direktorom Roberta Kochoweho instituta Lotharom Wielerom w Berlinje. Spahn napomina, runje w dowolowym času kedźbliwi wostać. K tomu słušatej dodźerženje hygieniskich směrnicow a kedźbliwosć na wjetšich swjedźenjach.
Merkel a Conte so zetkałoj
Berlin (dpa/SN). Něšto dnjow do wurjadneho wjerška EU staj so zwjazkowa kanclerka Angela Merkel (CDU) a italski ministerski prezident Giuseppe Conte dźensa zetkałoj, zo byštaj móžne rozrisanje zwady wo pomocnym pakeće EU za nowonatwar hospodarstwa po koronakrizy rozjimowałoj. Po zeńdźenju w hóstnym domje zwjazkoweho knježerstwa w Mesebergu sewjernje Berlina chcyštaj medije informować. Jutře wočakuje Merkel španiskeho premiera Pedra Sáncheza w Berlinje na rozmołwu.
Ministrojo so schadźowali
Policisća wosebiteho zasadźenskeho komanda wopušća runje ...
Ruska ličize zwrěšćenjom jednanjow z USA
Moskwa (dpa/SN). Ruska z tym liči, zo rozmołwy z USA wo wuchowanju poslednjeho wulkeho zrěčenja wo wotbrónjenju mjez woběmaj krajomaj zwrěšća. „Wuchadźam z toho, zo su USA hižo rozsudźili, zo zrěčenje njepodlěša“, rjekny wonkowny minister Sergej Lawrow minjeny pjatk w Moskwje powěsćerni Interfax. Lawrowej je wosebje kedźbyhódne, kak zaměrnje USA spytaja Chinu do jednanjow zapřijeć.
Zrěčenje „New Start“ k wobmjezowanju nuklearneho potenciala USA a Ruskeje za sydom měsacow wuběži. Moskwa a Washington stej drje so hižo k jednanjam zetkałoj, te pak wostachu dotal bjez wuslědkow. USA chcedźa zrěčenje wo kontroli brónjenja na Chinu rozpřestrěć. Peking pak so dotal spjećuje, wo swojim spochi přiběracym arsenalu atomowych bróni jednać.
Přehladka industrijneje kultury
Zwickau (dpa/SN). Wulki rozmach w Sakskej: Ze 4. sakskej krajnej wustajeńcu podawa so swobodny stat na multimedialne časowe pućowanje po pjeć lětstotkach krajnych stawiznow. Po oficialnym wotewrjenju minjeny pjatk w Zwickauwje je přehladka „Rozmach – 500 lět industrijneje kultury w Sakskej“ wopytowarjam nětko přistupna. Pola industrijneje kultury njeńdźe wo ničo druhe hač wo identitu našeho kraja“, rjekny Klaus Vogel, direktor Drježdźanskeho Hygienoweho muzeja, kiž je krajnu wustajeńcu we hłownym planował.
Po wobćežnym pytanju za prawym městnom a po přestorčenjach koronapandemije dla wěnuje so centralna wustajeńca w Zwickauwje prašenju, što su wšitke łamki a změny wot spočatka hórnistwa z ludźimi činili. „Saksojo móža sej swój kraj znowa wotkryć. Zdobom je to wizitka“, rjekny ministerka za kulturu Barbara Klepsch (CDU). Zamołwići wočakuja hač do 100 000 wopytowarjow.
Testy na lětanišću BER wuspěšne
Berlin (dpa/SN). Najebać njeplanowany wohnjowy alarm a z nim zwjazane přetorhnjenje zwučowanja komparsow na Berlinskim nowym lětanišću BER su zamołwići z dotalnymi wotběhami spokojom. „Proby z komparsami dotal derje běža“, zdźěli rěčnica lětanišća. Wokomiknje njeje tam žanych problemow. Minjeny tydźeń běchu započeli wotběhi na lětanišću z 9 000 dobrowólnikami zwučować, štož ma přez cyłe lěćo trać.
Minjeny štwórtk popołdnju bě wohnjowy alarm probowe wotběhi dočasnje skónčił. „Njebě pak žanoho wohenja a žanych płomjenjow“, rěčnica potwjerdźi. Wšitko je fungowało, kaž předpisane. „Připrawy k wotwodźenju kura so zapinychu, durje so zawrěchu a wohnjowa wobora bě po třoch mjeńšinach na městnje.“ Najwjace komparsow bě w tym času swoje nadawki hižo spjelniło. Woni mějachu wotběhi a puće wupruwować, wot přizjewjenja přez wotedaće wačokow hač k wěstotnemu checkej. Čehodla bě alarm wudyrił, dotal njewědźa. Pjatk je dohladowanska rada lětanišća wuradźowała. Planowany termin wotewrjenja lětanišća kónc oktobra chcedźa dodźeržeć.
To a tamne (13.07.20)
Hra billarda je so kónc tydźenja w braniborskim Finsterwaldźe bolostnje skónčiła, dokelž dyrbjachu jednoho z hrajerjow krawjaceje rany na hłowje dla w chorowni lěkować. Spočatnje běštaj so mužej wadźiłoj a sej mjez sobu nadawałoj, doniž skónčnje jedyn tamnemu z kijom na hłowu njebiješe. Skućićel je so na to sam pola policije přizjewił.
Internetnje a z tójšto małymi demonstracijemi su w Mnichowje lětuši Christopher Street Day (CSD) woswjećili. Pod hesłom „Přećiwo hidźe – Pisani, zhromadnje sylni“ su homoseksualni, biseksualni a transgenderojo na swoje prawa skedźbnjeli. CSD je so lětsa koronakrizy dla k žru politiskeho protesta wróćił, kaž rěčnik hibanja zdźěli: Město wulkeje party su ćicho přećiwo diskriminaciji protestowali. Za to běchu livestream zarjadowali a so w měsće po małych skupinkach zhromadźili.
Biden ma plan za hospodarstwo
Washington (dpa/SN). Přichodny demokratiski prezidentski kandidat USA Joe Biden ma srjedźostawske zawody za hospodarstwo kraja za jara wažne. Na wopyće zawoda w měsće Dunmore w staće Pennsylvania je wón inwesticiski plan 700 miliardow dolarow připowědźił, zo móhło so hospodarstwo po koronakrizy zaso zhrabać. W tym zwisku sej Biden žadaše minimalnu mzdu na 15 dolarow na hodźinu podwojić.
Egyptowski spion w zarjedźe
Berlin (dpa/SN). Sobudźěłaćer zwjazkoweho nowinarskeho zarjada w Berlinje je podhladny, zo je přez lěta za egyptowsku tajnu słužbu dźěłał, kaž z rozprawy wustawoškita wuchadźa. Zwjazkowy kriminalny zarjad bě muža loni wobkedźbować započał. Nowinarski zarjad nochcyše so k tomu dźensa hišće wuprajić. Po informacijach wustawoškita stej w Němskej dwě tajnej słužbje z Egyptowskeje aktiwnej. Hłownje zběratej wonej informacije wo tu bydlacych egyptowskich opozicionelnych.
Chaos noworjadowanja dla
