Berlin (dpa/SN). Lěwica w zwjazkowym sejmje žada sej nastupajo pjenjezy za krótkodźěło w časach koronakrizy jasnje wjace pjenjez mało zasłužacym kaž tež dźělnje a časowje wobmjezowanje přistajenym. „W tučasnej krizowej situaciji z dramatisce přiběracym krótkodźěłom su wosebje tući ludźo w eksistencnych wuskosćach“, rjekny dźěłopolitiska rěčnica frakcije Sabine Zimmermann powěsćerni dpa. Wuhódnoćiwši daty Europskeho statistiskeho zarjada frakcija Lěwicy zwěsći, zo je nimale 18 procentow wšitkich dźěławych z časowje wobmjezowanym přistajenjom wot chudoby wohroženych, wjac hač dwójce telko kaž ludźo z njewobmjezowanym přistajenjom (7,1 procent). Statny pjenjez za krótkodźěło měł so tuž wot nětko 67 procentow na 90 proc. a za ludźi z minimalnej mzdu na 100 proc. zwyšić. Lěwica chcyše dźensa w zwjazkowym sejmje wo tym rěčeć. Zwjazki dźěłodawarjow namjet raznje wotpokazuja.

Braniborska planuje šule a gymnazije poněčim zaso wotewrěć

Podstupim (dpa/SN). Wotstawk dodźeržeć, wšitko čiste dźeržeć, škit za hubu a nós wužiwać – hladajo na poněčimne wotewrjenje šulow žada sej Zwjazk pedagogow Braniborskeje jasne směrnicy politiki. Zamołwići komunow měli so wo to starać, „zo su hygieniske žadanja wot šulskeho busa přez rjadownisku rumnosć hač k sanitarnym připrawam w šulskim twarjenju wšědnje spjelnjene“, zdźěla zwjazk wučerjow. Za organizaciju wučby wočakuja wučerjo wot kubłanskeho ministerstwa bórzomne směrnicy za šulske zarjady a kubłanišća, zo by jednotne postupowanje zaručene było. Tak chcedźa wědźeć, kotre wosoby su wohrožene, kak a hdźe chcedźa škit za hubu a nós přepodać a z kotrej pomocu móža šule we wosebitej psychologiskej nuzy koronakrizy dla ličić.

Twarcy elektriskich šijawow w Japanskej njemóža tuchwilu dočinić, dokelž sej dale a wjace ludźi w kraju škit za hubu a nós samych šije, kaž nowiny rozprawjeja. Zawody maja trójce telko skazankow kaž hewak w tym času na blidźe. Dokelž nimaja w Japanskej dosć škitow, sej mnozy nětko šijawy kupja. Mustry za šiće firmy internetnje poskićeja.

Hudźba z wótřerěčakow ma zwěrjatam w bayerskich lěsnych parkach pomhać wostudu přewinyć, kotruž pobrachowacych wopytowarjow dla tuchwilu pasu. Za to hladarjo zwěriny wšědnje hudźbny program zestajeja a jón wot ranja we wosmich do wječora w šesćich wusyłaja. Při tym su wiolinowe koncerty runje tak słyšeć kaž twjerdy rock skupiny AC/DC. Mjez spěwami wothrawaja wodźenja wopytowarskich skupin. Koronawirusa dla su wšitke bayerske parki dźiwjeje zwěriny hač do 3. meje zawrjene.

Mnichow (dpa/SN). Tradicionalny Mnichowski oktoberski swjedźeń koronapandemije dla lětsa njepřewjedu. To staj bayerski ministerski prezident Markus Söder (CSU) a Mnichowski wyši měšćanosta Dieter Reiter (SPD) dźensa zdźěliłoj. Wopytowarjow a rumnostnych wobstejnosćow dla woznamjenja tajke zarjadowanje přewulki strach. Na oktoberski swjedźeń wot 19. septembra hač do 4. oktobra wočakowachu wjace hač šěsć milionow ludźi.

Trump: Njewidźomny njepřećel

Washington (dpa/SN). Prezident USA Donald Trump chce koronakrizy dla kóždežkuli zapućowanje do USA na wěsty čas zakazać. Wotpowědny wukaz wón bórze podpisa, kaž we Washingtonje připowědźi. Jako přičinu mjenowaše Trump „nadpad njewidźomneho njepřećela“ a trěbnosć, „dźěłowe městna našich wulkotnych ameriskich staćanow škitać“. Nadrobnosće wón žane njezdźěli, čehoždla tež prawniski pozadk jasny njeje. Na kóncu drje rozsudźa sudnistwa.

Tola so hišće dojednałoj