To a tamne (30.04.19)
Horce pomfritki z ketchupom je pinčnik w badensko-württembergskim Müllheimje 22lětnej žonje mjezwoči ćisnył. Žona bě sej w hosćencu jědź skazała. Dokelž pak bě w lokalu wjele ludźi, dyrbješe wona 90 mjeńšin čakać. Mjeztym bě wona hosćenc skrótka wopušćiła a druhdźe pojědła. Jako pinčnik pomfritki skónčnje přinjese, žona wo nje hižo njerodźeše. Na to so wón rozłobi a jej taler z jědźu do mjezwoča stłóči.
Wopasanu wjelrybu su norwegscy rybarjo našli a wuswobodźili. Zwěrjo bě so dny dołho jich čołmej bližiło. Při tym wuhladachu mužojo pas wokoło žiwota ryby, při kotrymž bě kamera připrawjena. Tam namakachu tež napis „Pětrohród“. Prawdźepodobnje bě něchtó zwěrjo dresěrował a ze žratwu mytował. Tak hodźi so rozkłasć, čehodla je so ryba čołmej bližiła. Hač móže sama přežiwić, njewědźa.
Europsku politiku rozłožił
Zapósłanc parlamenta EU z łužiskimi ratarjemi diskutował
Lejno/Konjecy (SN/MkWj). Ratarska politika Europskeje unije steješe w srjedźišću wopyta sakskeho zapósłanca Europskeho parlamenta dr. Petera Jahra (CDU) minjeny pjatk we Łužicy. W Döbelnje bydlacy Jahr, kiž skutkuje wot lěta 2009 w Europskim parlamenće, bě na přeprošenje serbskeho zapósłanca CDU w Sakskim krajnym sejmje Alojsa Mikławška do Łužicy přijěł.
Na spočatku wopyta 60lětny Jahr ratarski zawod Ralfa Hentzschela w Lejnje, w kotrymž produkuja tež symjo. Hentzschel bě lěta 1991 ratarski zawod staršeju přewzał a je jón zaměrnje dale wuwił. Dźensa předawaja symjo do 20 krajow po wšej Europje a samo hač do Łaćonskeje Ameriki. W rozmołwje z Jahrom sej Ralf Hentzschel přeješe, zo bychu sej ludźo dźěło burow zaso bóle wažili a na škit přirody z realistiskimi wočemi zhladowali. Přespěšnje so ratarjam wša wina za škody w přirodźe přisuwa.
Modlić so a surfować
Dissen (B/SN). W Hannoverskej krajnej cyrkwi mamy drje prěnjeho „kite-pastora“ Němskeje. Farar Erich Neumann z Dissena při Teutoburgskim lěsu je wukubłany wučer za kitesurfowanje – je to sportowa družina, při kotrejž so móc wodźeneho zmija wužiwa za pohibowanje na wodźe. Wot swojeje krajneje cyrkwje so wón nětko wo 25 procentow ze słužby wuswobodźi, zo by nastupajo časy surfowanja móhł nawjedować wot Swobodneje cyrkwje baptistow a wot krajneje cyrkwje njeseny misionski projekt „ewigkite“. Nawjedowacy referent za Misionske słužby Hannoverskeje krajneje cyrkwje Philipp Elhaus k tomu rjekny: „Hdźež ludźo wjace kemši njepřińdu, tam přińdźe cyrkej k ludźom.“
Wjace pomocy woporam
Socialisća wólby dobyli
Madrid (dpa/SN). Dotal knježaca socialistiska dźěłaćerska strona ministerskeho prezidenta Pedra Sáncheza je wólby do parlamenta w Španiskej z wulkim wotstawkom dobyła. Po dotalnym wuličenju ma wona 28,68 procentow. Ze 16,7 procentami hłosow je konserwatiwna ludowa strona PP najšpatniši wuslědk w swojich stawiznach nažnjała. Prěni króć zaćehnje prawicarskopopulistiska strona Vox z dźesać procentami do parlamenta.
Rekordne wudawki za brónje
Stockholm (dpa/SN). Zakitowanskeje politiki prezidenta Donadla Trumpa dla wostanu USA nastupajo wudawki za brónjenje dale na prěnim městnje w swěće. Zjednoćene staty inwestowachu loni nimale 650 miliardow dolarow do brónjenja, 4,6 procentow wjace hač lěta 2017. Tole zdźěla Stockholmski institut za měrowe slědźenje Sipri w Stockholmje. Po wšěm swěće su loni rekordne 1,8 bilionow dolarow za brónje wudali. Němska zaběra wosme městno.
Hofreiter namołwja Seehofera
Konferenca Kosowa dla
„Hallo! Ahoj! Cześć!“ blisko Žitawy
Zhorjelc/Žitawa (SN/at). Pólska a Čěska stej 1. meje 2004 Europskej uniji přistupiłoj. Składnostnje 15lětneho zhromadneho čłonstwa w EU wotměja němscy, pólscy a čěscy partnerojo w třikrajowym róžku pola Žitawy 1. meju wot 14 hodź. pisany swjedźeń za młodych a starych, kaž Zhorjelski wokrjes informuje. Pod hesłom „Hallo! Ahoj! Cześć!“ su wobydlerjo na „lětny podawk třoch krajow 2019“ přeprošeni, zo móhli susodow hišće lěpje zeznać. Předwidźane su koncerty, dźiwadłowe předstajenja a wohnjostroj. Ze Zgorzeleca a Libereca poskićeja kolesowarskej turje, ze Žitawskeho dwórnišća je to pućowanje do třikrajoweho róžka. Rozjimać chcedźa na přikład tež, kak je spěchowanje EU pomjezny rum přeměniło, kotre projekty Čechow, Polakow a Němcow pohonjuja sobu činić. Nimo toho měli so wopytowarjo ze wšěch třoch krajow we wobłuku swjedźenja k tomu wuprajić, što jim najbóle słodźi.
Zarjadowanje wotměje so we wobłuku wobstejacych kooperaciskich programow mjez wobdźělenymi krajemi.
Zełharna politika
To a tamne (29.04.19)
Kwasny korso na awtodróze je nadróžny wobchad na A2 pola Hannovera nachwilnje zlemił. Sčasami běchu wšitke jězdne blokowane, dokelž kwasowarjo na nich jědźechu. Šoferka wosoboweho awta na to policiju informowaše. Jako zastojnicy dojědźechu, bě so kwasna kolona hižo zminyła. Nětko přepytuja podhlada nuzowanja dla.
Dosć drohe mašiny za zmjerzlinu w jastwach su w Nowoseelandskej raznu kritiku zbudźili. Zarjadnistwa za jastwa běchu cyłkownje 193 mašinow za něhdźe 600 000 eurow kupili, reagujo na njewšědnje horce lěćo 2017. Konserwatiwna opozicija šwika „nadměrne brojenje dawkowych pjenjez“. Porno tomu zamołwići na to pokazuja, zo su loni w tohorunja horcym lěću wjele wuspěcha žnjeli. W jastwach wosta z pomocu zmjerzliny mjez jatymi poměrnje měrne.
Z europskim zapósłancom po puću
Xi wjace transparency přilubił
Peking (dpa/SN). Hladajo na mjezynarodnu kritiku nastupajo chinsku iniciatiwu za twar „noweje židźaneje šćežki“ je prezident Xi Jinping wjace wotewrjenosće přilubił. Na zazběhu wjerška wo infrastrukturnych planach po cyłym swěće je Xi dźensa w Pekingu tež wjace kooperacije, wobswětoweho škita a boja přećiwo korupciji připrajił. Iniciatiwa budźe „wotewrjena, zelena a čista“, připowědźi stronski a statny šef.
Debata wo žónskej politice FDP
Berlin (dpa/SN). Na zwjazkowym zjězdźe FDP kónc tydźenja w Berlinje wočakuje Berlinska politikarka Maren Jasper-Winter debatu wo namjeće zwjazkoweho předsydstwa jeje strony wo žónskej politice. Žónskopolitiska rěčnica FDP w Berlinskim domje zapósłancow je hłowna awtorka namjeta „Swoboda přez emancipaciju – liberalna agenda za samopostajowanje a mnohotnosć“, wo kotrymž maja delegaća rozsudźić.
Lěwica: Rolu dleje njewupředać
