Awtor dźensa

Tomaš Faska

Pisamy 2. winowca. Za mnje składnosć, pohladać do protyki sportowych stawiznow. Tele su zwjazane z wosobinskim jubilejom – narodninami wurjadneho čěskeho sportowca.

Tón abo tamny přećel motocrossoweho sporta so na njeho snano hišće dopomina, byrnjež so z časa jeho najwjetšich wuspěchow tola hižo něšto lětdźesatkow minyło. Rěč je wo Květoslavje Mašiće, kiž je dźensa před 60 lětami w Praze swětło dnja wuhladał. Mašita bě w 1970tych lětach jedyn z najwuspěšnišich pilotow na polu motocrossoweho sporta. A smě so rjec, zo bě swój čas najwuspěšniši na swěće. Z tak mjenowanym „Trofijowym teamom“ tehdyšeje Čěskosłowakskeje republiki doby wón mjez 1970 a 1978 šěsć króć woblubowane „Šěsćdnjowske wubědźowanje“, znate tež jako „Six Days Trial“, pozdźišo „Six Days Enduro“. Z lěta 1970 płaći tele wubědźowanje oficialnje jako swětowe mišterstwo za narodne mustwa.