Koparjo 1. mustwa SJ Chrósćicy hotuja so na druhu połojcu hrajneje doby­ 2018/2019, a to wot januara. Jich trenar Detlef Panic kładźe wot wšeho spočatka wažnosć na to, zo Chróšćenjo kondiciju a atletiku wotpowědnje trenu­ja.

Nimale kóždy kónc tydźenja w přihotowanskej fazy steješe testowa hra na programje. Tak nastupichu Chróšćanscy ko­­parjo spočatnje přećiwo Porchowej. Z jara młodej zestawu, w kotrejž stejachu wjacori hrajerjo młodźiny A, rěkaše kónčny wuslědk 1:1. Na kumštnym trawniku w Kamjencu, hdźež su Chróšćenjo wulki dźěl přihotow přewjedli, njeza­móchu woni jasne šansy wužiwać, mjez druhim přetřělichu jědnatku. Trenar Panic­­ chcyše pak, hladajo na wažne dypkowe hry, tež někotre nowe wěcy wu­spytać, tak zo njeměješe wuslědk žadyn wuznam.

Tež w druhej přećelskej hrě falowachu wažni hrajerjo. Najwuspěšniši třělc a nadběhowar SJC Jakub Beneš a dalši čěski hrajer Filip Henzl wupadnyštaj zranje­nja dla. Tak falowaštej SJC tež přećiwo Hnašecam-Dobruši poslednja konsekwenca a kreatiwita w ofensiwje. Jeničce Tom Henčl postara so při poražce 1:2 z direktnym wólnym kopom wo wrota.