Hórčan Damian Jurk hraje wot noweje sezony pola Drježdźanskeho SC (DSC). 19lětny je wot U19 Budissy Budyšin do sakskeje stolicy šoł a honi tam w krajnej lize za bulom. W prěnjej testowej hry zamó swoje kmanosće hnydom přećiwo staremu mustwu pokazać.

Koparsku karjeru zahaji w starobje pjeć lět w Chrósćicach. Dźewjeć lět hraješe za Sportowu Jednotku, dołho pod nawodom swojeho nana Handrija Jurka. Ze 14 lětami rozsudźi so za nowy nadawk. Tehdyši trenar młodźiny U17 Budissy Budyšin přeproša jeho na probowy trening, na kotrymž přeswědči. Přičiny za změnu běchu móžnosć lěpšeho wuwića, sylniši přećiwnicy a lěpše treningowe wuměnjena. Pola Budissy započa hnydom w U17, byrnjež hišće lěto pola U15 hrać móhł. Poslednje tři lěta w Budyšinje bě stajnje kapitan, štož pokaza, zo je Damian kmany, zamołwitosć přewzać. Wjeršk časa z Budissu bě postup U19 do krajneje ligi. W poslednjej sezonje docpě w 21 hrach wosom wrotow. Damian je jara dźakowny a zhladuje rady na rjany čas wróćo.