Žónske mustwo Dynama Drježdźany, kotrež su hakle před lětomaj załožili, je wospjet postupiło a hraje wot noweje sezony w krajnej lize. Drježdźanjanki su w hrajnej dobje 2025/2026 z 20 dypkowych hrow 17 dobyli, dwójce njerozsudnje hrali a jenož jónu přěhrali.

Hižo po hrě w Spitzkunnersdorfje, kotruž Drježdźanske koparki 5:0 dobychu, bě jasne, zo je postup do krajneje ligi wěsty. Tola tež w nachwatanskej hrě přećiwo Heidenauwje chcychu hrajerki Dynama doskónčnje dopokazać, zo su woprawdźe mišterki sezony. Tak porazychu koparkowi z městačka při zaliwje Mohilnicy do Łobja suwerenje 4:1. Po přiwzaću medaljow a pokala Sakskeho koparskeho zwjazka Drježdźanjanki hač do pózdnjeho wječora postup wjesele wo­swjećichu. Zdobom rozžohnowachu trenarja Renéja Müllera, kiž swój hamt wosobinskich a časowych přičin dla złoži.

W krajnym pokalnym kole hraja Drježdźanjanki w prěnim hłownym kole přećiwo SZ Lipšćanske wobchadne zawody. Pokalna hra přewjedźe so njedźelu, 16. awgusta, w 14 hodź. w Lipsku. Domjacy cyłk je w minjenej hrajnej dobje w prěnjej stafli měšćanskeje klasy druhe městno wobsadźił.