FC Energija Choćebuz – FC Carl Zeiss Jena 0:1 (0:1)
Zestawa domjacych: Stahl – Hasse (84. Böhmert), Eisenhuth, Hildebrandt, Borgmann, Kujovć (60. Putze), Erlbeck, Proničew, Schulz (60. Kremer), Engelhardt, Zografakis
wrota: 0:1 Fabian Eisele (38.)
Nic jenož wuslědk, tež wukon hosćićela na hrajnišću bě za 1 000 dowolenych přihladowarjow přesłapjacy. FC Energija njeje so ženje do hry namakała. Hosćo pak pokazachu wokřewjacu hru w ofensiwje. Tak so rumy za hraće za FCE přeco zaso pomjeńšichu. K tomu přidružichu so špatne přihrawki a domjacym hrajerjam pobrachowaše trěbna wola za dobyće. Tajku pak mějachu na hrajnišću hosćo z Durinskeje. W Choćebuzu poradźi so jim rewanša za poražku 0:1 doma w Jenje a wuslědk by hišće jasnišo wupadnyć móhł. Toni Stahl we wrotach Energije pak wysokej poražce zadźěwa, jako wón štyri do šěsć tak mjenowanych „stoprocentnych“ šansow wotwobara.