Prěnje wolejbulowe mustwo holcow a žonow Sportoweho towarstwa Viktorije Worklecy je dalšu hrajnu dobu we wobwodnej lize wuspěšnje zakónčiło a po 16 hrach a šěsć dobyćach 7. městno wobsadźiło. Wjacore hry běchu Worklečanki jenož snadnje přěhrali.
Za prěnje zastupnistwo zasadźene běchu na poslednim domjacym hrajnym dnju: Luisa Budarjec, Majka Dźisławkec, Diana Hajnec, Marta Handrikec, Klara Kralec, Magdalena Pilzec, Constance Pötschke, Anja Šmitowa, Sarah Šnablec, Emma Šustrec, Hannah Šustrec, Jana Žurowa, trenarka: Daniela Kralec
ST Viktoria Worklecy – Ochranowske wolejfantki 0:3 (20:25, 19:23, 23:25)
Wolejfantki po sylnej seriji nadaćow spočatnje 5:0 nawjedowachu, Worklečanki pak zamóchu ze samsnym zapalom a tohorunja wótrymi nadaćemi 5:5 wurunać. Po tym slědowaše faza, w kotrejž dypkowaštej wobě mustwje ze swójskimi wuspěšnymi nadběhami abo zmylkow přećiwnika, kaž do saka abo z hrajnišća bitych bulow dla. Poněčim pak wolejfantki tempo přićahnychu. Tutomu njemóžachu Worklečanki cyle slědować a wotedachu prěnju sadźbu z 20:25 na přećiwnika.
