Žitawski hórski běh, mjeztym 46. raz přewjedźeny, słuša sobu k najstaršim wurisanjam cyłeje Němskeje. We wobłuku tutoho wulkeho wubědźowanja tež mnozy atleća we wšěch wotpowědnych starobnych klasach pućowarjow (6/8/12/22/32 abo 42 km) swoju wutrajnosć a spěšnosć měrja.
Cyłkownje je wjace hač 5 000 wobdźělnikow sportowało. Z nich je so na 1 500 za běhanje rozsudźiło, a mjez nimi tež zaso horstka serbskich.
Na 0,6 km wubědźowachu so 203 předšulske dźěći. Na distancy 4,0 km (324 w cilu) su šulerjo wšěch klasow a starši dorosćeni mocy měrili. Tu startowaštaj tež Jarek Schade (U 10) a jeho sotra Jitka (U 12) z Budyskeje Serbskeje šule. Jarek doby w swojej skupinje mjez 48 šulerjemi w 18:34 min a wobsadźi z wurjadnym časom cyłkowne 2. městno mjez wšitkimi 166 staršimi šulerjemi kaž dorosćenymi. Jitka wubědźi sej z časom 23:34 min jara dobre 10. městno w swojej klasy U 12 wot 54 kontrahentkow. Za njej doběža hišće 144 staršich šulerkow a žónskich do cila.