Dźeń pozdźišo znowa přěhrali

Mittwoch, 24. Februar 2021
Artikel bewerten
(0 Stimmen)
Chris Straube, nowy trenar Łužiskich lodohokejowych liškow  Foto: Thomas Heide Chris Straube, nowy trenar Łužiskich lodohokejowych liškow Foto: Thomas Heide

Łužiske liški Běła Woda – EHC Frei­burg 0:2 (0:0, 0:2, 0:0)

24 hodźin po poražce přećiwo Freiburgej (3:4 po třělenju penaltyjow), wočakowachu Běłowodźanscy lodohokejisća znowa team z Breisgauwa w liščej jamje. Za hosći běše to třeća hra w běhu štyrjoch dnjow, štož pak na lodźe pytnyć njebě. Nimale kóždu 50:50-situaciju woni za sebje rozsudźichu, skutkowachu čerstwiši a wojowachu wo kóždy puk domjacych. Pola žołto-módrych Łužiskich liškow ­njeje tónraz w defensiwje klacało, ale skerje w ofensiwje. Nazhonići hrajerjo, kotřiž bychu poprawom ceptar do rukow wzać dyrbjeli, mějachu špatny dźeń.

Partija hodźi so spěšnje analyzować. W prěnjej třećinje běchu Běłowodźanske liški hišće lěpši cyłk, znowa pak na jara sylnym wrotarju hosći Benu Meisneru zwrěšćichu. Wón bě kaž hižo dźeń do toho najlěpši akter. Freiburgčanow w druhej třećinje trjechichu woni dwójce do čorneho (27. a 39.), štož hodźi so na kóždy pad jako zasłužene wopisać. Wšako běchu nětko aktiwniši team. A w třećim wotrězku hóstni hrajerjo efektiwnje zakitowachu, njemějachu pak při tym přewulke ćeže, dokelž Běłowodźanam zas a zaso ideje falowachu.

Veröffentlicht in Sport
Bitte anmelden, um einen Kommentar zu posten

Serbska debata

Neuheiten LND